Saitual District Implementation Demand Committee pawhin Saitual District hnathawhtir thuai tura sorkar an ngenna a hlawhtlin loh avangin Thawhlehni, Independence Day-ah zing dar 5 atanga tlai dar 5 thleng total bandh huaihawt an tum a, hei hi Saitual District Implementation Demand Committee, vawiina Saitual Block Resource Centre-a thukhawmin a rel a ni. An thutkhawmna hi he Committee Chairman, Pu Rohmingliana’n a kaihruai a, an thil phut tihhlawhtlinna atana na zawka sorkar nawr an tum thu an sawiho a, Saituala kawng an zawh ni, July ni 31 atanga vawiin thlenga in hrang hranga flag var an tar pawh lak thlak ni se, Saitual District siam tura tel ve duh lo, Thingsulthliah tlang dunga khaw hrang hrangte chu a hmuna kalin thil awm dan hrilhfiaha, an thil phut chu duhpui tura sawm ni se an ti bawk. Puan tawh angin, Thingsulthliah tlang dunga khuate chuan Saitual District siam tuma tel ve an duh loh thu hi tun thla ni 5 khan thuchhuah siamin an lo tarlang tawh a, an tel duh loh chungchanga thuchhuahtute hi Thingsulthliah tlang dung All NGO leh VC tangrualin Joint Action Committee a din leh Thingsulthliah thalai pawlte an ni.
