BDS seat 4 hmuh belh vangin MPCC lawm

0
486
views

Rorel lai pawl, Mizoram Pradesh Congress Committee chuan Central Pool atanga Mizoramin BDS seat 4 a hmuh belh chu lawmawm an tih thu leh, hemi atana Pu Lal Thanhawla leh Higher and Technical Education Minister, Pu R. Romawia tan lakna chu chhuanawm an tih thu an sawi a. Central Pool atanga Mizoram seat chan tihtlem a nih chungchangah CM-in Union Health Minister chu lehkha a thawn nghal bakah, sorkar laipui hotute dawr tura H&TE Minister, Pu R. Romawia’n New Delhi a pan nghal leh MP pahnih, Pu C.L. Ruala leh Pu Ronald Sapa Tlau-in a theih ang anga sorkar laipui hotute an dawr nghal chu fakawm an tih thu an sawi a ni. MPCC chuan, tun thlenga Mizoramin hetiang harsatna a tawh chhan chu MNF vang nia sawiin, thenawm state – Assam, Manipur leh Meghalaya chuan Medical College an neih avangin Central Pool-ah an innghat ve tawh lova, MNF khan an sorkar laiin Falkawna State Referral Hospital kha lo tihhlawhtling sela chuan, hetiang harsatna hi Mizoramin a tawk tawh lo tur nia an ngaih thu an sawi. Mizoram Quota tihpun dan ngaihtuaha New Delhi-a kal, H&TE Minister, Pu R. Romawia leh Secretary, Pu Benjamin-a chu vawiin khan AMC Ward No. 1 Councillor Pu R. Zomuanpuii hovin Durtlang leh Leitan Congress hruaituten Lengpui tumhmunah an lo hmuak a ni.

Mizoram Peoples Conference erawh chuan, MBBS leh BDS zir nana Mizoram Quota tihtlem a nih chungchanga sorkar laipui hotute dawr tura New Delhi-a kal, H&TE Minister, Pu R Romawia leh hotu dangte chu beidawng takin an lo kir nia sawiin, tha nat thlak an tih thu an sawi a. Sorkar laipui hotute sawi dana MBBS leh BDS seat chu mihring tam dana zira pek a nih chuan, chhiarpui hnuhnung ber, kum 2011-ah khan Mizorama mihring awm zat chu nuai 10 leh sing 9 vel a nih avangin Mizoramin MBBS-a seat a chan tur chu seat 27 tihna a ni a, heti chunga sorkar laipuiin MBBS seat 17 chauh a pe chu a dik lo nia sawiin, sorkar laipui hotuten Mizo mipuite an tham lohzia leh an hnuaichhiahzia a tilang chiang hlea an ngaih thu an sawi.