Central Pool atangin Mizoramin BDS zirna tur, seat 4 a hmuh belh. Zonet thu dawn danin, damdawi lam zirna atana Mizoramin
seat a hmuh zat tihpun dan ngaihtuaha New Delhi-a kal, Higher and Techincal Education Minister, Pu R. Romawia’n nimin tlai khan Union Health & Family Welfare Secretary, Pu C.K. Mishra chu a pisa-ah hmu-in, Mizoram seat hmuh chu tihpunsak turin a ngen a, Pu C.K. Mishra chuan Mizoramin BDS seat a neih sa, 3 chu 4-a tihpuna, 7 pek a nih tur thu, Minister hi a lo hrilh a, MBBS-ah pawh seat tam zawk a chan theih dan tur ngaihtuah a nih tur thu leh, state dangin MBBS seat an neih, hnawh khah loh a awm chuan Mizoram chu ngaih pawimawh hmasak a nih tur thu a lo hrilh a. Heti hian Central Pool atanga Mizoramin damdawi lam zirna atana seat a neih chu MBBS seat 17 leh BDS seat 7 a ni ta a ni. Pu R. Romawia chuan BDS seat 4 hmuh belh chu duhthusam ni lo mah se, engmah hawn loh ai chuan hlawhtling thawkhata a ingaih thu a sawi a, kum dang zelah chuan Central Pool atanga state quota siamrem a nih dawnah tan lak tawh ni se tha a tih thu a sawi.
Mizoram sorkar Quota-a MBBS leh BDS zir turte tana Counselling neih hun tur chu tihfel a la ni lova. MBBS leh BDS zir turte hian tun thla ni 31 ral hmaa Admission an tihfel hman a ngaih avangin Counselling hi a rang thei ang bera buatsaih a nih tur thu, H&TE hotuten Zonet an hrilh a ni. Vawiin tlai dar 4 khan H&TE Secretary, Pu Benjamin-a hovin an Department hotuten MBBS leh BDS zir turte tana Counselling neih dan tur hi an ngaihtuah nghal nia hriat a ni.
