BJP kaihhruai sorkar laipuiin India-a chengte tan sakhaw pakhat, \awng pakhat tih an thupui anih avangin Mizo kristiante chu dinhmun derthawng takah an ding mek tih MPCC President, Pu Lal Thanhawla’n a sawi.

0
333
views

Vawiina Congress Bhavan-a inkhawmah Pu Lal Thanhawla chuan, Jammu and Kashmir-ah pawh mipui an ralmuang lo hle a, an thil tih dodal thei tura ngaih mi 300 vel chu pawn chhuak thei lova hren an ni a, Chief Minister \um 3 lo ni tawh leh MP nilai Farooq Abdullah pawh Public Safety Act hmanga hren a ni a, Jammu and Kashmir hi Muslim chen taman ni lo se, sorkar laipui hian tuna a tih ang hian a ti kher ang em tih chu ngaihtuah tham a ni, a ti.

Pu Lal Thanhawla chuan, tun hnai maiah Hindu pawl mi 100 rual zet, Mizoram luh phalna ILP an neih leh neih loh pawh hriat lohten CM Pisa tualah Tuikuk thlavang an hauh a, an chet dan hriat chian tuma kal Congress \halaite erawh Police-in an lo dang leh si tih sawiin, kristian-te tan sorkar laipui chu an hlauhawm tawh nak a laiin tuna Mizorama sorkar mekte vang hian an hlauhawm lehzual a ni a ti.
Citizenship Amendment Bill pawh hmarchhak mipuiten nasa taka an dodal chungin BJP President, tuna Union Home Minister ni ta Amit Shah chuan an sorkar a nih chuan CAB an thar thawh tur thu hmarchhak bial ngeiah a sawi tih Pu Lal Thanhawla hian a sawi a, Assam sorkar-in National Register of Citizens (NRC) a buaipui mek a, hei pawh hi Hindu ni lote dah pawnlang tumna a ni a, CAB chungchangah pawh \awng\aina nen \an lak nasat a ngai hle a ni, a ti.

Sorkar-in District thar pathum a tihlawhtlin takte chu an lawmpui hle tih sawiin, Pu Lal Thanhawla chuan, MNF-in an Term hmasa-a District thar a puante kha Congress kaihhruai sorkar khan tihpuitlin loh a tum ngawt bik lova, amaherawh chu District thar siam chu inkhualtelemna ang lek ni lovin thil tak tak a ni a, District ramri tihfel mai a harsa a. India rama Assembly bial \hen dan enfiahtu Delimitation Committee chu kum 2026-ah an \hutkhawm dawn chauh avangin tuna District thar puan takte hian kum 2023-a Mizoramin Assembly inthlanpui a hmachhawn turah khawi District-ah nge Nomination an tihfel dawn tih pawh ala hriat lova, Mizoram pum pawh hi State danga District pakhat pawh tiat lo a nih avangin District thar siam hi a \ul ber em tih pawh ngaihtuah theih a ni, a ti.

He inkhawm hi MPCC Secretary, Pu C. Dothansanga’n a kaihruai a, MPCC General Secretary, MLA hlui Pu R. Vanlalvena leh Secretary, Pu James Thanghmingmawia pawhin thu an sawi a ni.