Tunthla ni 20 a Chakma Autonomous District Council inthlan tur atana Congress Candidate turte vawiin khan MPCC President Pu Lal Thanhawla’n Congress Bhavan-ah a puang a. Congress MDC nilai zingah hnawl an awm lo. Chief Minister nibawk Pu Lal Thanhawla hian CADC a Congress Sorkar chu rokhawlna engemaw avangin Mizoram Larsap in a suspend niin a sawi a. Chanchinbumite zawhna chhangin, inthlan puan hmaa CADC Congress Sorkar suspend a ni chu inthlan turah an chhiat phah a rin loh thu a sawi a, Candidate tur zingah MDC nilai hnawl an awm loh thu sawiin an chak leh chak loh chu vote chiar hunah a hriat mai dawn a ni a ti a, Candidate zingah hmeichhia pakhat a tel tih a sawi bawk. CADC ah hian bial 20 ah inthlanna neih a ni dawn a, Congress hian bial zawng zawngah candidate an dah kim vek a ni. Chakma Autonomous District Council (CADC)-a congress sorkar dinglai chu dan kalha thil ti-a puh a ni a, Lawngtlai DC in a chhui chian hnuah heng puhnate hi nemnghetin Governor chuan March ni 22 khan CADC thuneihna zawng zawng hi a laksak a ni.
