Central YMA Office Bearer Congress Bhavan-a lengte MPCC President, Pu Lal Thanhawla leh Office Bearers dangten an lo dawng sawng

0
318
views

An inkawmnaah hian Central YMA hruaitute chuan Mizoram sorkar leh HPC(D) ten inremna an siamin, Sinlung Hills Development Council \hiatin, Sinlung Hills Council din a nih thu an sawi a, SHC-ah hian Mizoram roll-a chuang miah lo hruaitute an awm a, Zoram mipui tan a him lo em tih ngaihtuahna a awm thu an sawi a, inremna an siampui HPC(D)-te chu Mizoram mi an ni a, Manipur leh Cachar lamah an la awm a, bu an la rawn khuar leh thei em tih te an ngaihtuah bakah mipuite thin thi takin awm se an duh thu an sawi bawk.

Central YMA President, Pu Vanlalruata chuan kumin inthlan turah sum leh therhlo hmang lo turin theihtawp chhuah nise Central YMA chuan an duh thu sawiin, pawisa nei lo tana candidate chance a awm loh phah tur khawpa thil tih a hlauhawm thu sawiin Election Commission-in inthlanna senso atana a phal chin cheng nuai 20 pawh hi Mizoram tan chuan a tam mah mah nia an hriat thu a sawi a, inthlanna fel leh thianghlim neih theih nan thawhhopuiah MPCC hruaitute chu a sawm bawk.

Central YMA President chuan Tripura refugee camp-ah political party-te campaign lo se YMA chuan an duh tih sawiin, camp-a awmte dawr tum an awm chuan political party hrang hrangte nen an \ang tlang turah an ngai tih a sawi a, Election Commission of India hian camp-a awmte hi an awmna hmuna vote thlak tir \alh a tum chuan khauh taka dodal an tum dawn tih an sawi bawk. CYMA hruaitute chuan Tripura Bru camp-a awmte chuan he inthlannaah hian vote an thlak an duh chuan Mizorama vote an neihna hmun ngeia vote thlak tir chu an duhdan a nih thu Congress party hruaitute chu an hrilh bawk.

Central YMA hruaitute chuan Chakma candidate neih loh chu All NGO Co-ordination Committee-te dinna a la nih reng thu sawiin, Party \henkhat chuan neih loh vek chuan neih loh an inhuam thu a sawi a. A nei luite laka hmalak zel dan tur chu NGO Co-ordination Committee-in a la rel dawn nia sawiin, he inthlannaah hian Chakma MLA an awm a nih pawhin dinhmun sang pek loh chu YMA duhdan a nih thu an sawi bawk.

MPCC President, Pu Lal Thanhawla chuan an party chuan inthlanna felfai an duh ber tih sawiin, felfai taka inthlan duh vangin in tina lut lawra campaign lo turin an candidate te an hrilh niin a sawi bawk.