Chakma Autonomous District Council inthlanna chu April ni 20-ah neih a ni dawn

0
553
views

Member 20 awmna, Chakma Autonomous District Council inthlanna chu April ni 20-ah neih a ni dawn. Hemi chungchanga hriattirna hi Mizoram State Election Commission chuan nimin chawhnu khan a chhuah a, hemi rual hian Returning Officer pawhin a chhuah ve nghal a ni. Inthlan puan a\ang hian Model Code of Conduct pawh hman nghal a ni. He inthlanna neih tura chuh duhte tan nimin a\ang khan Returning Officer hnenah hming a pek luh theih nghal a, hming pek luhte hi April ni 4, tlai dar 3 thleng dawn theih a ni ang. April ni 5-ah hming pek luhna lehkha chu endik a ni ang a, inhnukdawk leh duh tan April ni 6, tlai dar 3 thleng hun hawn a ni ang a, April ni 7-ah candidate te chhinchhiahna pek a nih bakah an hming tar chhuah a ni ang. Vote thlak ni tura ruat April ni 20-ah chuan zing dar 7 a\anga tlai dar 5 thleng vote thlak a ni ang a, vote tla te hi April ni 24 zing dar 8 a\anga chhiar a ni ang a, zawhfel thleng chhiar chhunzawm a ni ang. Inthlanna hi a pumpuiin April ni 28-ah zawhfel a ni ang a, member thlan thar te sitting hmasa ber chu May ni 4-ah neih a ni ang. Chakma Autonomous District Council inthlanna neih turah hian vote nei mi 30,565 an awm a, vote an thlakna turin Polling Station 66 siam a ni a, Polling Station lian deuh vote nei mi sang chuang awmna 4-ah te chuan a belh chhahna Auxilliary Polling Station 1 \heuh siam a ni. Hemi hmalam, tun thla ni 22 khan Mizoram Larsap chuan Chakma Autonomous District Council thuneihna lak sakin a aia hnathawk turin Lawngtlai Bawrhsap a ruat a, hetianga a tih nachhan hi Chakma Autonomous District Council-in dan bawhchhiaa thil an tih vang niin sorkar thu chhuah chuan a sawi a ni. Hetihlai hian Lawngtlai Bawrhsap hna chelhtu Dr. Arun T. chu sorkarin Aizawlah a sawn nghal a, a hna chelh tur chu Special Secretary hna a ni a, a aiawh turin Disaster Management & Rehabilitation Deptt. Director, Pu N. Chakhai a ruat a ni. CADC ah Congress party chuan member 17 neiin ro a rel a, CADC term dinglai hi thla thar April thlaa tawp tawh tur a ni.