Chakma Autonomous District Council inthlanna naktip ni 20-a neih tur atan campaign theih hun chu vawiin tlai dar 5-ah khan a tawp ta. Hetihlai hian Polling Station awm zawng zawng 66-a duty tur Polling Party te pawh an vaiin vawiin khan chhuah tir vek an ni a, an zinga ami Polling Party engemawzat chu hmun hla leh kilkhawr, kawng awm \hat lohna khuaa kal tur an ni a, heng zinga khaw 4 te chu motor kawngin a pawh loh avangin lawnglenga kal hnua kea kal leh ngai te a ni a, zaninah emaw, naktuk chawhma lamah emaw an duty na tur hmun hi an thleng dawn a ni. Polling Party te hian an duty na hmun \heuhah naktukah Polling Station an siam fel dawn a ni. Zawhna chhangin inthlanna buaipuitute chuan an ruahmanna siam tun thlengin tluang takin an la kalpui zel niin an sawi a, Bangladesh ramri hrula khaw tam takah inthlanna neih a nih dawn avangin venghimtu Police \hahnem tak dah an ni. Polling Station 66 zingah hian ramri hrul ami Polling Station 6 te chu ven uluk ngai zual an ni. He inthlanna neih turah hian vote nei mi 30,565 an awm a, heng mite hian candidate 63 zing a\angin an aiawha roreltu tur an thlang dawn a, chungte chu Congress Candidate 19, MNF Candidate 18, BJP Candidate 19 leh Independent 7 an ni a, Fultuli biala Congress Candidate Pu Kali Kumar Tonchongya chu chuhtu awm lova tlinga puan a nih avangin Fultuli bialah hian inthlanna a awm dawn lova, amaherawhchu, he biala MNF Candidate, Pu Sumir Tongchongya-an RO thutlukna siam hi Guahati High Court Aizawl Bench-ah a khin avangin he thu hi May ni 14-a ngaihtuah turin Court-in a dah a ni. He inthlannaa vote tla te hi tun thla ni 24-ah chhiar a ni ang a, inthlanna pumpui hi ni 28-ah zawhfel a ni ang.
