Chakmate khua leh tui dik tak an nih avangin dodal tur a ni lo Mizoram CM-in ti

0
754
views

CM, Pu Lal Thanhawla’n Chakma-te chu India khua leh tui dik tak a nih avangin a pawnga puia dodal ngawt chi an ni lo niin, vawiina Congress Bhavan-a inkhawmah a sawi a. Chakma chungchang hi politics-a intlansiakna atan hman chi a ni lo tih sawiin, politics a nih avangin engkim tih a thiang vek kher lova, pawl thil tih turte pawh ringtu tih atan a mawi em tih ngaihtuah tel a \ul tih a sawi. Pu Lal Thanhawla chuan, Arunachal Pradesh-a Chakma awmte chu sorkar laipuiin a thuneihna hmanga a barh luih nia sawiin, tun hnaia Supreme Court-in India khua leh tuia pawm tura a tihna, Arunachal Pradesh mipuiin an dodal chu an tih tur dik tak niin a sawi a. Mizoram bikah chuan Chakma-te chu dan ang taka khua leh tui nihna nei an nih avangin an nihna pawm thiam mai a \ul tih sawiin, heti chunga doal an nih chuan chi leh chi inthliarna rawng kai a nih theih dawn avangin fimkhur thiam a ngai tih a sawi. Chakma-te chu India khua leh tui an nih avangin an sahimna ngaihtuahtu chu dan hnuaia sorkar mawhphurhna a ni a, anmahni \an vang ni lovin, dan leh thupek kenkawh chu sorkar mawhphurhna a nih avangin ven himna hna thawh kawngah sorkar-in a tih tur a ti dawn tih CM chuan a sawi a. A \ul a nih chuan silai hmeh puah pawh a ngai dawn a, hemi kawngah hian a \ul anga thil ti turin dan leh thupek keng kawhtute pawh a tih dan tur hrilh an ni tawh niin a sawi. Pu Lal Thanhawla chuan, Chakma-te nek chep duh chuan tharum ni lovin, zirna lam leh sumdawnna lama \an lak chu tih dan tur dik nia zawk a ngaih thu leh, haw haw-a nawr an nih chuan tun aia dinhmun \ha zawk nawr chhuahsak palh hlauhawm a tih thu a sawi a, pawi an lo khawih a nih pawhin a chin fel dan zawnga sawipuitu nih thiam zawk ngai a tih thu a sawi.

Chief Minister chuan, CBI ko lut tura ngentute hian CBI chu duh hun huna koh luh theih a ni lo tih an hre chiang hle niin a sawi a. CBI koh luh hi a awlsam lo tih hi kum 10 chhung sorkar an kaihhruai lai khan an hriat chian hman avangin an hlau lo nia a ngaih thu leh amah chu tan tir an duh tak tak a nih chuan Court-ah Criminal Case thehluh mai se \haa a hriatpui zawk thu a sawi bawk. He inkhawm hi MPCC General Secretary, Dr. LH. Chhuanawma’n a kaihruai a, tun hnaia Minister of State atana lak luh thar, Pi Vanlalawmpuii Chawngthu leh Mizoram Women Commission Chairperson thar, Pi M. Zohmingthangi pawhin thu an sawi a ni.