Tukin dar 8:40 vel khan Chaltlang Dingdi vengah Bolero Pick Up MZ 01- 9542 chu a chesual a, vanneihthlak takin thi leh hliam an awm lo. Aizawl Traffic atanga ZONET thu dawn danin, Bolero Pick Up hi Champhaia Pu K Lalrinsanga ta, Mualchenga Pu Lalherliana khalh a ni a, kawng chho-a a tlan laiin chhuak zo lovin a hnung zawngin a tawlh a, kawng sira tlak dal chu su chhia in Feet 20 vel a lum hnuah a thlanga Pu Lalhmachhuana te in, Assam Type a zu deng a, a táng zui ta a ni. He Bolero Pick Up chetsual lai hian mi pahnih an chuang a, an hliam na vak lo nia hriat a ni. Chaltlang khawtlang hruaitute hnen atanga thu dawn danin, he motor hian Pu Lalhmachhuana te choka leh inthiarna chung zawn a delh chhe hle a, in chung Rangva delh chhia-in a bang, leirawhchan rem pawh a tichhia a, choka bungrua engemawzat a chhe bawk a, he vanduaina thlen lai hian in chhungah mi awm mah se, vanneihthlak takin hliam an awm lo a ni. Motor hi lak chhuah a la ni lo a ni.
