Champhai District Court-a Additional Sessions Judge, Pu R. Vanlalena chuan mahni fanu, kum 11 vel mi pawngsualtu, Lalhriattluanga, Vanzau khuaa A. Thanzuala fapa chu kum 10 lung in tang tur leh Rs.9,000/- chawi turin vawiin chawhnu khan a chungthu a relsak. Lalhriattluanga hian kum 2013 khan a fanu hi a pawngsual a, hei hi a nupui-a pa-in a hriat hnuah kum 2015 February ni 10 khan Champhai Police Station-ah FIR a thehlut a, chumi bawhzui chuan Lalhriattluanga hi man a ni a, a thil tih dik lo tak hi finfiah a nih hnuah Court chuan kum 10 lung in tang tur leh Rs.9,000/- chawi turin a chungthu a relsak ta a ni.
Vawiin chawhnu vek khan Champhai District Court-a Additional Sessions Judge, Pu R. Vanlalena chuan mahni nupui vaw hlumtu, BRTF Labour New Champhai Venga awm, Agnu Sahu chu kum 9 chhung lung in tang tur leh Rs.8,000/- chawi turin a chung thu a relsak a, Agnu Sahu leh a nupui, Khuangthanmawii hi New Champhaia khawsa \hin an ni a, kum 2015, June ni 4 zing khan a nupui hi an chenna in bulah thia chhar a ni a, a lu-ah hliam hmuh a ni a, a hnar leh bengah te thi a chhuak a, kut tuara thi ni ngeia hriat a nih avangin Police te chuan rinhlelh thil thilah Agnu Sahu hi an man a, thil awm dan zawhfiah a nih hnuah Khuangthanmawii hi a pasal thah nia hriat a nih avangin tualthah thubuai siamsak a ni a, Additional Sessions Judge, Pu R. Vanlalena chuan Khuangthanmawii thih dan hi a finfiah hnuah a pasal hi thiam loh chantirin kum 9 lung in tang tur leh Rs.8,000/- chawi turin a chungthu a relsak ta a ni.
