He thu hi Horticulture Department bultuma vawiina hmar chhak bialte tana Mission for Integrated Development of Horticulture chungchang inrawnkhawmna Aijal Club-a neihah sawiin, Horticulture Minister ni bawk Pu Zoramthanga chuan Mizoramah thlai chin theihna hmun ram Hectare 7,000 a zau a awm a, heng ramte hi tun aia hman \angkai a nih chuan ei leh bara intodelhna tham a ni a, heng ram \ha laiahte hian thlai chi khat chauh ni lo, kum khatah thlai chi hnih-chi thum thar tura \an lak a \ul a ni a ti a, hmarchhak bialte tan chuan leilung a\anga thar chhuah ngei primary sector-a innghah chu a daih reiin a tlo ber tih a sawi.
Pu Zoramthanga chuan, hlawk zawka thlai thar chhuak turin thil pawimawh 4, thar chhuah tihpun, a phurhna tur ngaihtuah, a sawngbawlna leh thai thar hralhna ngaihtuah a \ul tih sawiin, hemi piah lamah hian thlai chin dawnah ram mipuite mamawh ngaihtuah thiam tel a ngai tih a sawi bawk. Chief Minister chuan, mau sawngbawl lam chu a tuina a nih thu leh Chief Minister a nih hmasak \um pawhin Mau Chief Minister ti hiala an koh fiam thu sawiin, hei hi a chhan chu mau hmanga intodelh tura nasa taka \an a lak vang niin a sawi a, an sorkar loh kum 10 chhung khan hemi kawngah hian tha thlah lova theihtawp a chhuah reng thu sawiin, tuna ruahmanna an siam danah chuan ram Hectare 2-a zauvah mau chingtuten kum khatah cheng nuai 5 a\anga nuai 9 vel an la lut thei dawn a, chu aia zau enkawlte phei chuan kum khatah cheng vbch. 1 chuang an la lut thei dawn nia sawiin, mau hmanga sumdawnna chu Mizoram mai ni lovin hmarchhak bial tan sum hnar \ha tak a ni thei dawn a, ram sum leh pai dinhmun siam\hat kawngah nasa takin a \angkai dawn niin a sawi.
He inkhawm hi Horticulture Secretary, Pu Rodney L. Ralte-in a kaihruai a, hetah hian hmarchhak biala State hrang hrang Arunachal Pradesh, Assam, Manipur, Meghalaya, Mizoram, Nagaland, Sikkim leh Tripura a\angin Horticulture Department aiawh an tel a, sorkar laipui MIDH-a Assistant Commissioner, Pu SK Kaul pawh he meeting-ah hian a tel a ni. He inkhawmah hian sorkar laipuia Horticulture Consultant, Dr. Namita Bhuyan-i’n Mission for Integrated Development of Horticulture chungchang a sawifiah a. Chawhnu lamah MIDH Asst. Commissioner, Pu SK Kaul-a kaihruaiin technical session neih a ni a, kum 2020 March ni 31 hnu lama North East State paruka MIDH zau zawka kalpui dan tur te, MIDH programme an hman mekah harsatna an tawh dan leh hlawhtlinna an hmuhte sawi ho a ni. Mission for Integrated Development of Horticulture sorkar laipui \anpuinaa Horticulture-in a huam thei leh thlai, pa, pangpar, mau, coconut leh thil danga hmasawn theihna tura \an lakna a ni.
