Chief Secretary Pu Lalnunmawia Chuaungo in ramchhung hmun hrang hrang-a Mizo tangkhang, rawn haw tum mi 8415 sorkarin a chhinchhiah tawh tih a sawi.

0
11
views

Health Minister Dr R Lalthangliana hova sorkar mipawimawhte thutkhawmnaah Pu Lalnunmawia Chuaungo hian, tangkhang rawn haw duh te hi sorkara in hriatirna tur format siam sa hmangin an inziaklut tih a sawi a, rel hmanga rawn haw tur te chu Bairabi thleng rawn kal theih dan tur ruahman a ni a, rel pakhatah mi 1200 zel rawn chuang tura tih a ni a ti.

Mizo hlang rawn chuanna tur chu Bairabi rel chawlh hmun thleng tura ruahman a nih lai hian an awmna a zirin hmarchhak state dangte ruala rel hmanga rawn haw ngaite pawh an awm dawn tih Chief Secretary hian a sawi.

Phai atanga rawn hawte dah hranna tur chungchangah, tuna rawn haw leh turte dah belh turin ruahmanna awmsain a dawl zo dawn lo tih Chief Secretary hian a sawi a, hmun khata mi tam tak dah chu a hlauhthawnawm avangin mahni in lama inkhunghranna nei tha, Village, Local Level Task Force te hriatpuina in Home Quarantine phalsak theih dan tur ngaihtuah a ni a ti a, man chawia hotela awm duh tan pawh ngaihtuah sak an ni dawn tih a sawi.

Pu Lalnunmawia Chuaungo hian, inkharkhip mekin Mizoram sum leh pai dinhmun a ti thuanawp tih a sawi a, fimkhur tak chungin, khawsak phung pangngai kalpui a tul dawn tih a sawi a, upa lam leh natna benvawn nei sate leh naupangte chu uluk taka ven an ngai dawn a, nun dan phung hrim hrimah inthlak tulna lai a awm dawn a ni a ti.