Zonet thudawn danin, Pu J. Lalhmingliana eirua puh a nih chungchang hi Lokayukta thurawn angin ACB chuan a chhui mek a, he thubuai an chhuinaa thu an hriat duh hrang hrang zawtfiah turin vawiin khan Congress \halai hruaitute hi an ko a ni. Puan tawh angin Congress \halai chuan Civil Aviation Wing Principal Consultant, Pu J. Lalhmingliana hian sorkar sum a mimal Account-ah a dah nia sawiin, a sum enkawl dana thil felhlel awm nia lang chu chhui chian a nih theih nana hmala turin kumin April ni 26 khan Chief Minister, Lokayukta leh Chief Secretary hnenah an ngen a. An ngenna bawhzuia Lokayukta-in ACB chu he thubuai chhui tura a tih angin tun thla ni 16 khan ACB chuan Preliminary Inquiry an nei \an a, an thil chhuina report chu Lokayukta Chairperson hnenah an thehlut dawn a ni.
Congress \halaite hian a hna-a Pu J. Lalhmingliana Appointment pek anih danah thil fel tawk lo a awm nia sawiin kumin January ni 23-a amah ruatna Order chhuakah Head of Department anga chhal a ni a, Civil Aviation Wing chu GAD hnuaia Wing pakhat chauh a ni a, Head of Department chu GAD Secretary a nih lai a, hetianga Head of Department anga chhal a ni chu thil dik lo a ni, an ti bawk.
