Zan khat riaka Tlabung tlawha zin Dr. Thangtea hian, ram pahnih insumdawn tawnna tura ruahman Kawrpuichhuah Integrated Check Post pawh tur kawngpui, cheng vaibelhchhe 83 senga sial mek pawh a dinhmun zirchianga tlawhin, he kawng sial hna thawktu leh a viltute pawh a kawm nghal a, ram pahnih insumdawn tawnna tura thil pawimawh hmasa a nih avangin, kawngpui sial chu Sorkar-in a ngaipawimawh tih ABCI Infrastructure pvt. ltd hotute a hrilh a ni.
Ramri bula Kawrpuichhuah ICP hmunhma tura ruahman pawh Commerce and Industry minister hian tlawhin, ram pahnih insumdawn tawnna tura hma lak tawh chin leh, hmabak bawhzui ngai te a zirchiang a, hei bakah hian metre 660-a sei ram pahnih inkal pawhna tur lei dawhna hmun tur pawh Pu Thangtea hian a tlawh nghal a ni.
Tlabunga kan corr. zawhna chhangin, Commerce and Industry Minister chuan, Kawrpuichhuah ICP a nih dan tur ang a nih theih nan, Mizoram Sorkar-in theihtawp chhuaha a bawhzui tur thu a sawi a, a tul dan azirin Sorkar laipui bakah Bangladesh Sorkar-ah pawh dan anga ram pahnih insumdawn tawn theihna tura bawhzui dan kawng zawn zel tum a nih thu a sawi.
Kawrpuichhuah ICP hi a buaipuitu tur Land Ports Authority of India kuta hlan mai theih tura engkim peihfel thawkhat ni tawh mah se,ruahmanna thar zam a nih avangin siam that ngai lai titha tura bawhzui mek a ni a, ICP category thuma then zinga category ‘B’-a awmtir tumin a ram zauzawng pawh acre 20 atanga acre 32 vela siam tum a ni a, ram pahnih inkalpawhna tur lei dawh nan hian cheng vaibelchhe 230 vel ruahman chhin a ni bawk.
Dr. R Lalthangliana hi Lunglei HPC vice chairman Pu Lawmawma Tochhawng leh Bamboo Development Committee vice chairman Dr K. Pachhunga bakah Commerce and Industry director Pu J Hmingthanmawia leh mi pawimawh dang thahnem takin an tawiawm a ni.
