Congress Disciplinary Action Committee in an Vice President, Home Minister Pu R Lalzirliana insawifiah tura hriattirna an pek chu a hriatpui tih party President Chief Minister Pu Lal Thanhawla’n a sawi.

0
375
views

 

MPCC buatsaih, MIMER leh Tuirial HEP lawmna vawiina neihah chanchinbumiten MPCC Disciplinary Action Committee in an party Vice President Pu R Lalzirliana show cause notice a pek a hriatpui em tih an zawhna chu ‘hriatpui e’ tiin Chief Minister hian a chhang a, insawifiah tura hun pek Zirtawpni thlengin insawifiah ta lo se’ng engtia tih nge I tum tia zawhna chu ‘Ka hre lo’ tiin a chhang a ni.

Vawiina Congress party in MIMER leh Tuirial HEP an lawmnaah hian Home Minister Pu R Lalzirliana hi a tel lo a ni.

Mizoram Pradesh Congress Committee Vice President nilai, Pu R Lalzirliana, Home Minister hi Thawhlehni khan an party Disciplinary Action Committee in insawifiah tura hriattirna Show Cause notice an pe a, chutah chuan chanchinbu lamah Tawi biala MNF Ticket-a ding tura sawm a nih thu tarlan anih thu leh MNF Party hotu pawimawh tak takin Election puan veleh MNF a zawm dawn tih an sawi fo thu te tarlan a ni a, heng thilte hian party chhung boruak a ti chiai tih tarlangin, Zirtawpni tlai dar 3 ral hmaa party mipuite hriat theih tura insawifiah turin an hriattir a, hun tiam chhunga a insawifiah lo emaw, a insawifiahna chu pawm tlak a ni lo emaw anih chuan a tul angin a chungah action lak a nih tur thu an lehkhaah chuan an tarlang a ni.

Insawifiah tura hriattirna pek a ni a hrethiam lo hle tih Pu R Lalzirliana hian sawiin, He thil lo chhuah danah a chunga dik lo taka thil tih tum an awm ni ngeia a ngaih thu a lo sawi tawh a ni.

Congress party hian inthlan lo awm tur atana an party candidate turte ngaihtuah turin Nomination Committee chu August ni 30 khan an lo din fel tawh a, hapta hnih liam hnuah pawh tun thleng chuan an la \hukhawm lo a. Nomination Committee ah hian Chairmanah Pu Lal Thanhawla leh Secretary ah Pu KS Thanga te ruat an ni a, Pu R Lalzirliana hi member dang 7 zinga pakhat a ni.