Covid-19 hrileng vangin Mizoramin GST a hmuh zat April thlaah nasa takin a tlahniam.

0
142
views

Mizoram State Tax Commissoner, Pu Kailiana Ralte in Zonet zawhna a chhan danin, kumin January thla chhung khan GST atang hian cheng vbch. 39 hmuh a ni a, February-ah cheng vbch. 43 leh March-ah cheng vbch. 48 hmuh a ni a, hrileng vanga inkharkhip hnu April-ah chuan GST hmuh zat hi cheng vbch. 12 chauh a tling a ni.

Kumin chhung hian GST atanga sum hmuh tura beisei chu cheng vbch. 600 a ni a, hei hi hmuh phak ngei beisei ni mah se, Covid 19 hri leng vanga harsatna a thlen chhunzawm zel chuan hmuh phak loh palh awm thei a ni tih State Tax Commissioner chuan a sawi a, sum hmuh tura beisei hi State Budget-a ruahman tel tawh anih avangin an hmu tling loh palh a nih chuan sum hmanna lamin a tuar thei tih mipuiten hria se a duh thu a sawi.

Taxation hotute chuan, Mizoram chhunga State GST atanga sum hmuh zat chu April ni 14 thleng khan cheng vbch. 1 leh nuai 64 a ni tih an sawi a, hei hi thla kal mekah pung hlekin, tun thla ni 14 thlenga sum hmuh tawh chu cheng vbch. 2 leh nuai 62 a ni a, GST atanga sum hmu tur hian sumdawngten GST Return an thehluh a ngai a, hei hi sumdawngten an ngaihpawimawh a tul tih Taxation hotute chuan an sawi.

Sorkar kum liamta 2019-20 chhung khan GST atangin Mizoramin cheng vbch. 667 a hmu a, hei hi sum hmuh tura beisei cheng vbch. 521 aiin cheng vbch. 145-in a tam zawk a ni.