Health Minister Dr R Lalthangliana’n coronavirus laka Mizoram a him zel theihna turin tun hi fimkhur ngaih hun lai ber a ni a ti.

0
49
views

Mipuite hnena thuchah a siamah, tuna Mizoram dinhmun chu zan hnih khat thil thu-a fimkhur loh vanga chhiatna vawr tawp thleng thei reng a la ni a ti a. Sorkar, Kohhran leh mimal tinin theih tawpa hma an lak avangin Covid-19 hri vei hriat theih chinah Mizoramah an awm rih lo tih a sawi a, hetihlai hian loh theih lohvin, ei leh bar lakluh kawngahte a pawi lo chinah inthlahdul deuh a tul a, Mizoram sorkarin hmun danga tangkhangte lakluh hna ngawrh takin a kalpui mek bawk a, ram pawn atanga lo lut an awm loh lai khan Mizoram chu him mahse, tunah erawh state dang atanga tam tham tak an rawn haw tak avangin, an lo hawna kawng lakah pawh kai palh an awm thei a, kawng tinrengah a hma aia nasa zawka fimkhur tlan a ngai a ni a ti.

State dang atanga lo haw khawmte pawh anmahni an invawn fel a ngai tak zet tih Dr R Lalthangliana hian a sawi a. Sorkarin dan leh hrai zawm tur a siamte uluk taka zawm tlan anih loh chuan zan hnih khat thilah fimkhur loh avanga chhiatna vawrtawp Mizoramin a thleng thei reng tih hriat tlan a tul a ni a ti.

In khung hrang mekte chu an duhthusam anga tha leh nuama enkawl an nih loh pawhin “Ram tana an tih ve theih an ti a ni tih in hriaa lungdam taka pawm thiam turin Health Minsiter hian a ngen a, Mizoram-a lo thleng tharte chu thil thleng palh thei a la awm a ni tih hre chunga thian tha leh chhungkhat lainate tlawhpawh kawngah fimkhur turin a ngen a. A nawlpui tam zawk an lo luh fel hnu pawhin chawlhkar hnih dawn chhung chu fimkhur zual a la ngai dawn a, chumi hunah chuan Mizoram ram dinhmun a la hriat theih chauh dawn a ni a ti.

Health Minsiter hian Mizoram dinhmun enin Covid-19 vanga dam lo tam zawk enkawl chu a la zuamawm loh hle tih a sawi a. ZMC-ah ICU khum 7 a awm a, dam lo pakhat ringawt enkawl pawh a buaithlakin, Doctor leh thawktu dangte enkawlna senso pawh a hautak a. Covid-19 dam lo hi doctor zawng zawngte enkawl theih a nih loh avangin, a enkawltu bik an awm a ngai a, a damdawi pawh khawvel mithiamten an la hmuh chhuah loh avangin Mizoram a him zel theih nan thuawih tlan a tul a ni a ti. Health Minster thuchah hi Chanchin thar puan zawhah chhiar chhuah a ni ang.