December ni 31 hmain Bank Account leh Aadhar Number thlun zawm vek tur- SBI Lead Bank Office

0
438
views

State Bank of India, Lead Bank Office chuan, mipuite chu kumin December ni 31 hmaa an Bank Account leh Aadhar Number thlun zawm vek turin a hriattir a. Sorkar laipui thuchhuak angin, Bank Account leh Aadhaar Number thlun zawm lote chuan nakkum January ni 1 atangin an Account-a pawisa an la chhuak thei dawn tawh lo tih sawiin, harsatna an tawh loh nan a rang thei ang bera an Bank Account leh Aadhaar Number thlun zawm turin mipuite a hriattir a ni. SBI chuan, Bank Account leh Aadhaar number thlun zawm hi Bank hnathawkte mawh a nih avangin an hnathawkte chu nasa zawka tan la turin a chah a. Anmahni dawrtuten harsatna an tawh loh nan hun tiam ral hmaa an huam chhung theuhah a theih ang anga tan la turin a hriattir bawk. Sorkar laipui Finance Ministry hnuaia Financial Services Department chuan tun hnaia Bank Account leh Aadhaar number thlun zawm tura hriattirna hi a tichhuak a, hemi bawhzui dan tur hi Zirtawpni kal ta khan Aizawl Bawrhsap, Pu Kannan Gopinathan hovin Aizawl khawpui chhunga Bank hrang hrang Manager-ten an sawi ho a. Pu Kannan Gopinathan chuan, sorkar laipuiin tangka chhehrelh khapna dan a siam thar angin Bank hotute chu an hnuaia Account neiten Aadhaar Number nen an thlun zawm vek theih nana tan la turin a ngen a ni.