UD&PA changtu Minister nibawk Pu Tawnluia hian Kolasib Sports Complex sa tura project bul tantu UD&PA Minister hlui Pu Zodintluanga Ralte in Kolasib Sports Complex hawnna inkhawm a hmanpui thei chu lawmawm a tih thu a sawi a, a hmawrbawktua a tang thei chu vannei a intih thu a sawi a ni.
Pu Tawnluia chuan infiamna lama hmasawnna thlen turin Mizoram sorkarin Sports Policy siamin bul a \an dawn a, UD&PA department pawhin infiamna ruhrel din kawngah thalaite hmakhaw ngaiin hma a la chhunzawm zel dawn a ni a ti.
Sports & Youth Services Minister Pu Robert Romawia Royte pawhin thu sawiin sorkar laipuiin sports a ngaipawimawh thar hle a, national Education Policy tharah phei chuan sports hi curriculum pakhat angin a telh dawn a, school tinah subject khat angin a awm tawh dawn a ni a ti a, Mizoram sorkar pawhin nasa tak \an lak a tum a, Mizorama football ground hrang hrang 13 chu phullem (artificial turf) phah tura ruahmanna siam fel tawh a ni a ti.
Sports Complex sak hna hi 2015 kum bulah \anin kumin September thla khan zawhfel a ni, Artificial Turf Football Ground, 8-Lane Synthetic running track, Boxing Room, Gym Room, Office leh mipui 700 thut theihna bakah Gallery, mi 120 thut theihna te dah a ni.
