DIG Northern Range leh Southern Range huam chhunga thubuai ziah luh kuminah tlem

0
404
views

Kumin kum chanve chhunga DIG Northern Range leh Southern Range huam chhunga thubuai ziah luh chu nikum hemi hun chhunga thubuai ziah luh aiin zaa 4.32 in a tlem zawk. Vawiin khan Northern Range leh Southern Range DIG, Pu Joseph Lalchhuana hovin Police Headquarters Arya Mess-ah kumin kum chanve chhunga pawi khawihna hrang hrang thlen dan hi thlir let a ni a. Hemi chhung hian Aizawl district-ah IPC hnuaiah thubuai 623 leh Non IPC hnuaiah 80 ziah luh a ni a, hei hi nikum hetiang hun chhunga mi aiin 102-in a tlem zawk a, Non IPC hnuaiah erawh chuan 9-in a pung a ni. Champhai District-ah pawh IPC hnuaiah thubuai 63, Non IPC hnuaiah thubuai 65 ziah luh a ni a, Serchhip District-ah IPC hnuaiah 38, Non IPC hnuaiah 80, Mamit District-ah IPC hnuaiah thubuai 80, Non IPC hnuaiah 15, Kolasib District-ah IPC hnuaiah 186, Non IPC hnuaiah 33 ziah luh a ni a, Lunglei District-ah IPC hnuaiah 112, Non IPC hnuaiah 21, Lawngtlai-ah IPC hnuaiah 43, Non IPC hnuaiah 8, Siaha-ah IPC hnuaiah 63, Non IPC hnuaiah 12 ziah luh a ni. Kolasib leh Mamit Dist-ah IPC hnuaiah nikum aiin thubuai ziah luh a tam zawk a, Mamit tih loh District dang zawngah Non IPC hnuaiah nikum aia thubuai ziah luh a tam zawk vek thung a ni.

He Crime Review Meeting-ah hian DGP, Pu Thianghlima Pachuau chuan, tun thlenga Mizoram Police hnathawh tawh chin chu a tha thawkhat nia a hriat thu leh hmasawn zel tura tan lak erawh chu a tul thu a sawi a. Tunlaiin ruihhlo leh a kaihhnawih thil hrang hrangin Mizoram a run mek tih sawiin, a tam zawk hi Myanmar atanga dan lova lak luh a ni a, a neitu leh a lo zuar chhawngtuten hremna na zawk an hmachhawn theih nan, dan tlawhchhan fel tak hmanga thubuai siamsak a tul thu a sawi. Ram pumah Mizoram chu thil sual titute hrem tamna ber nia sawiin DGP chuan, thil sual tite chu an phu tawka hrem an nih zel theih nan training pawh a tam thei ang ber buatsaih chhoh zel tum a nih thu a sawi.