Durtlang Road-ah lungin in hnawl

0
420
views

Bawngkawn, Durtlang road-a Pu Vanlalsiama in, Assam type chhawng hnih chu nizan dar 11:30 vel khan kawng chhak lung tla-in a hnawl a, vanneihthlak takin thi leh hliam an awm lo. Bawngkawn Local Council Chairman, Pu H. Lalduhkima hnen a\anga thu dawn danin, helai hmunah hian nizan thim hlim, dar 6:30 vel khan lung tlem a lo tla tawh a, a bul Tui Pump-a vai pakhat inbual chu lung tla hian a tukkhumah a deng a, Durtlanga Synod Hospital panpui a ni a, a ngaihtuahawm lutuk lo nia hriat a ni. Zan dar 9:30 vel khan lung hi a tlak nawn leh avangin in neitu, Pu Vanlalsiama-te chhung chu an riak chhuak a, zan dar 11:30 velah lung hi a tla leh a, Pu Vanlalsiama-te in hi a hnawl ta a ni. In neitute chhungkua hian bungrua engmah an chuh hman lova, an \henawma hmun remchang laiah an invawm lut rih nia thu dawn a ni. Lung tla hian Bawngkawn leh Durtlang inkalpawhna kawngpui chu lirthei eng chi mah kal tlang theih lohvin a hnawh ping vek a, lung tlakna hmun hi vawiin khan Aizawl Bawrhsap hnuaia Disaster Team-in an enfiah a, kawng chhak lamah hian lung tla leh mai thei a la awm nual avangin khawih ngam a la ni lova, mipuite him zawk nan lung tla leh mai theite chu hal darh a, senghawi a nih hma loh chuan kawngpui hi lirthei kal tlang theiha siam rih loh ni se an ti a ni. Bawngkawn leh Durtlang inkar kawngpui a pin avang hian Durtlang leh a chhehvel a\anga Aizawl lam pan turte chu Zuangtui lama kaltir a ni.

In chim hi vawiin khan Bawngkawn Local Council leh YMA bul tumin khawtlang mipuiin an buaipui nghal a. Bawngkawn Local Council Chairman, Pu H. Lalduhkima chuan bungraw lak theih ang ang an la chhuak tih sawiin, bungraw senghawi tur hi a awm mumal lo niin a sawi. Kawng chhak lama lung tla leh mai theite chu Geology and Mining leh Aizawl DC Office Disaster Wing-in then fai hnua a him tawk tih an puan hnuah khawtlangin in thar an sak sak leh dawn tih a sawi. Chhiatna thlenna hmun hi vawiin khan bialtu MLA, Pu R. Romawia’n a tlawh a, hnatlang thingpui lum nan cheng 2,000 a pek bakah chhiat tawk chhung te hi \anpuina a pe a. Aizawl Mayor, Pu PC Lalhmingthanga leh a thawhpuite pawhin an tlawh bakah \anpuina an pe bawk.