Rajya Sabha member term hmang zo mai tawh tur, Pu Ronald Sapa Tlau hian vawiin khan Aijal Club-ah thuthar thehdarhtute a kawm a, Mizorama FCI kudam hrang hrangah buhfai quintal nuai 2 vel chhekkawl sa a awm tih a sawi a, Aizawlah quintal sing 4 vel, lunglei-ah sing 3 leh 7900 vel, Lawngtlaiah sing 3 zar 8 chuang, Bairabi-ah sing hnih sang 8 vel, Kolasib-ah sing 2 sang 7 chuang, Bualpuiah quintal sing 3 sang 4,500 chuang chhek khawl a awm tih a sawi a. Kawng laka thang mek a awm bawk avangin tun dinhmunah buhfaiah thlaphanna tur a awm lo tih a sawi.
Pu Ronald Sapa Tlau chuan, Tanhril-a FCI kudam tih zangkhaina tura Sairang Dinthar venga FCI kudam sakna tur atan Central PWD in contractor tur pawh a ruatfel tawh tih a sawi a, hetihrual hian hrileng vangin hna tan theih ala nih loh thu sawiin hrileng ziaawm hunah hna tan thuai tum a ni a ti a, Khawchhak lam chawmtu tur Khawzawl-ah buhfai matric tonn sing 3 sang 3,400 len theihna FCI kudam sakna tur pawh tihfel a nih tawh tih a sawi.
Pu Ronald Sapa Tlau chuan, hri leng vanga ram mipuiin ei tur an tlakchham loh nan PMGKAY hnuaiah April, May leh June thla chhungin a thlawnin buhfai sem a ni tih a sawi a, hetah hian Mizoram bikah buhfai quintal nuai 1 leh 230 sem ral a ni a, November thla thlengin pawhsei leh a ni a ti.
State pawn mi tangkhang te hnehah buhfai sem turin May leh June thla chungin quantal 6,680 pek chhuah a nih thu pawh Pu Ronald Sapa Tlau hian a sawi.
