Govt. Champhai College-a zirtirtu rualten ramri venga duty, YMA member te leh mipuiten a thlawna an hman tur, kut tihfaina, hand sanitizer vawiin khan hnatlangin an siam.

Science Professor te chuan Hand sanitizer hi College Chemistry Laboratory-ah an siam a. Ethanol, aloevera, glycerol, distilled water leh hriak te chawhpawhin, kut silfaina sanitizer hi litre 15 an siam a, remchang hmasa berah YMA duty te hnenah an sem dawn a, ATM-ah a thlawna hman theih turin an hung nghal bawk. Zirtirtu rual hian mamawh dan a zirin siam belh zel an tum tih an sawi.