Haulawng-a Scrub Typhus vei hmuhchhuah zat 140 tling tawh

0
696
views

Lunglei Disrict-a Haulawng khuaa rannung seh natna, Scrub Typhus vei, vawiin thlenga hmuhchhuah zat chu 140 an tling ta. Vawiin khan inringhlel enfiah mi 112 zinga 47 chu rannung seh vanga damlo an ni tih hriat chhuah leh a ni a, hemi hmalam hian damlo 93 hmuhchhuah an lo ni tawh a ni. Haulawng khua hi Lunglei Chief Medical Officer, Dr. VLMS Dawngliana leh a thawhpuite chuan vawiin khan an tlawh a, damlo awmdan leh tun thlenga enkawl dan te an enfiah hnuah vawiin chawhnu khan Lunglei panin an let leh a ni. Integrated Diseases Surveillance Programme hnuaia Mizoram State Nodal Officer, Dr. Pachuau Lalmalsawma leh rannung seh lama mi thiam Entomologist, Pu Lalfakzuala Pautu te chuan vawiin chawhnu khan Haulawng khua an thleng a, anmahni lo dawngsawngtu khawtlang hruaitute leh YMA hruaitute nen damlote dinhmun leh he natna vei nia inringte enfiah dan chu an enpui nghal a ni. Zanin inkhawm banah VC leh YMA te nen tang tlangin vantlang inkhawm an veng Community Hall-ah an nei dawn a, hetah hian rannung seh, Scrub Typhus thehdarhtu tuhrik chanchinte, a kai dan leh he natna veite enkawl dan mipuite an zirtir dawn a, he natna hi rannung seh avanga kai theih nimahsela chiai lova invendan leh inenkawl dan thiam turin mipuite an zirtir ang a, mipui lam atanga zawhna awmte pawh an chhang nghal dawn a ni. Puan tawh angin rannung seh natna Haulawng khuaa leng vang hian thi an la awm lo a ni.