Health Minister, Dr. R. Lalthangliana chuan Mizoram mi leh sa, state pawna tangkhang rawn haw tur hi a tira hisap aia an tam tak avangin Quarantine Facility ruahman pawh a hautak hle tih a sawi a, Mizoramah positive case awm lo anga a lan rih avangin thla a muang sual ang tih a hlauhawm a, hri inkaidarh tamna hmun atanga Mizorama rawn haw tur an tam avangin, fimkhur a tul hle tih a sawi a, sorkarin fimkhur takin hma a la a ni a ti.
Disaster Management & Rehabilitation Minister, Pu Lalchamliana chuan tangkhang Mizorama rawn haw tur mi singkhat dawn an awm tih a sawi a, tunah hian kohhran hrang hrangte nen indawrin Quarantine Facility atan kohhran hall hman an remtih chuan harsatna a chhawk zangkhai dawn a ni a ti.
Aizawl District ah hian Quarantine Facility 20, mi 1114 leng tura ruahman a awm a, tunah hian mi 672 quarantine mek an awm a ni.
