Health Minister Dr R Lalthangliana’n Mizoram pawn lama awm mekte zingah zirlai ang chi, awmna mumal tak neite chu harsatna bik an tawk a nih loh chuan Mizorama haw tum kher lo turin a chah.

0
48
views

Zonet in vawiina a pisa-a a kawmnaah Health Minister hian Mizoram-a haw duhte zingah zirlai leh training nei laklawh ang chi thahnem tak an awm tih a sawi a, hri leng boruak a ziaawm veleha in hawng leh mai turin zirna in hrang hrangte pawh an inbuatsaih mek avangin Mizorama an lo haw chuan an zirna kawngah harsatna an tawk zawk palh thei a, anmahni hmakhaw ngaih vangin, awmna hmun tha tak nei, harsatna tawk lem lo te chu lo haw rih lo turin an duh tih a sawi.
(Dr Thangtea bite)

Mizoram pawn lam tanga tangkhangte an lo haw theihna tura kawng hawn a nih tak avangin mi sing chuang rawn haw tur an awm tih Dr R Lalthangliana hian a sawi a, heng mite zinga thenkhat chu Covid-19 len nasatna hmun atanga lo haw turte an nih avangin fimkhur leh zuala thil tih a tul a ni a ti a, mipui him tlanna tura sorkar ruahmanna siamte mipuite leh a lo haw thar turten tha taka an zawm chuan Mizoram chu hrileng lakah a him zui zel theih a beisei tih a sawi.

Tun dinhmuna Mizorama lo haw duh, sorkara inhriattir tawhte chu mi sing chuang an nih avangin, anmahni khung hranna tur Quarantine Centre indaih tawk buatsaih nghal theih a rinawm loh tih Health Minsiter hian a sawi a, a tah tawla an lo haw a tul dawn avangin June thla tawp lam thlengin insengluh hna chu thawh a la tul a rinawm a, July thla tawp lam thlengin mipuite fimkhur taka an la awm a ngai dawn tih a hmuh lawk theih a ni a ti.

Covid-19 dona kawngah Health Dept bikin sum leh paiah harsatna lutuk a tawk lo tih zawhna chhangin Health Minister hian a sawi a, sum mamawhte finance changtu Chief Minister Pu Zoramthanga’n a ngaihtuahpui nghal zel tih a sawi a, hetihrual hian pawisa hmang turin sorkar kalphung-a tihfel ngaite a awm thin avangin duh hun taka sum hman tur neih hman loh chang erawh a awm tih a sawi.

Zonet Zawhna chhangin Dr R. Lalthanglianna hian Covid-19 len mek laia Health Minister hna a chelh chu vanduaina ni lovin chona-ah a ngai zawk tih a sawi a, amah pawhin thil tam tak a hriat belhin a zir belh tih a sawi.