An party office Mizo Hnam runah thu sawiin Pu Lalchhandama Ralte hian, Lawngtlai leh Saiha tih loh, District dang zawngah DPC kaltlangin interview an nei dawn tih a sawi a, hetah hian DC chu Board Chairman a ni ang a, District Education Officer chu Secretary a ni ang a, District tin DIET Principal leh SDEO senior ber te chu member an ni ang a ti a, an mahni vil turin DP&AR aiawh pakhat \heuh an \hu tel dawn bawk tih a sawi.
Pu Lalchhandama Ralte hian, District tina zirtirtu lak chu tihfel nghal vek a ni dawn tih a sawi a, Minister dawhkanah emaw Director dawhkanah emaw final tur a ni lova, appoinment order erawhchu Directorate atangin an tichhuak thung dawn a ni a ti.
Education Minister hian MR Teacher lak tur chungchangah eptu party leh mi\henkhatin party mi leh duh duh la tur anga an sawi chu thu dik lo a ni a ti a, zirtirtu an lak turah engkim langtlang vekin an kalpui a, an tih dan tur zawng zawng pawh an puang zar vek tih a sawi.
Primary School zirtirtu 817 leh Middle School zirtirtu 64 sorkarin a lak dan turah Written test nei lova interview hmanga lak tum anih avangin eptu party leh Mizo Students Union ten na takin an sawisel a, MSU leh Sorkar chuan hun lo kal leh zel turah zirtirtu a hlawma lak leh a awm anih chuan written test neih \hin tawh tur a ni tiin inremna an siam a ni.
