Vawiin khan Thorang bialtu MLA, UD&PA Minister Pu Zodintluanga’n a bial chhunga tuilian leh lei khi avanga harsatna tawkte tlawh.
Pu Zodintluanga hian lei khi kak avanga khaw chhung chanve zet harsatna tawk mek Bunghmun panin Phairuang Bunghmun kawngah a kal a, lei min tam tak thianfai nghal zelin tui lian avanga harsatna tawk Zawlpui leh Bolia khua a tlawh a. Zawlpui khua hi tun tum ruah sur avanga tuilian khan a khaw pum deuh thaw a chim a. Pu Zodintluanga hian an harsatna tawhte a hmunah a en a, in 20 chuang inthiarchhuakte chu tui a kam tawh avangin an chenna inah an let leh tawh a. Zawlpui leh Bolia khua tui lian vanga harsatna tawk te hi an mamawh zualpui phuhrukna tur tanpuina a pe a ni. Thorang bial chhung hian tuilian a tuar nasa hle a. Marpara South-ah in a chhe nual a, Terabonia leh Sumasumi khaw pumin tuilian an tuar a, Tuikawi khua pawh a tuar na zingah a tel a ni.
