Inrinni-a Lunglei Civil Hospital-a covid-19 vei hmuhchhuah, 13Bn BSF sipai pahnihten inentir tura Lunglei Civil Hospital an tlawh avangin Lungleiah mipui an ralkhel hle a, heng miten hrileng an kai tih hriat chhuah hmaa an awmna, Vanhne thenawm, Rahsi Vengin vawiin atangin mipui pawn chhuah an khap.

0
297
views

coronavirus kai sipaite hi Assam state Dolcherra khuaa ni 10 khunghran tawh, Dolcherra-ah an swab sample test result negative tawh hnua Lunglei pan an ni a, June ni 25-ah Lunglei an thleng a, Vanhne rama BSF Transit Camp ah an awm a ni. He hmuna an awm lai hian Covid-19 lan chhuah dan ang dam lohna an neih avangin Lunglei Civil Hospital-a inentir tura hruai an ni a, Civil Hospital Screening Point-ah rinhlelh an nih avangin hruai hran an ni a, an sample endik hnuah covid-19 an kai tih hmuh chhuah a ni

Zonet JB in thu a dawn danin, June Ni 24 khan Dolcherra atangin BSF sipai mi 13 te hian, Batallion motorin lunglei an pan a, Tuirialah zan riakin, June ni 25 zingah Lunglei panin an lo chhuak a, Civil mi te nen inhnaihna an neih hriat a ni rih lo thung.

Lunglei Civil Hospital Medical Superintendent Dr SR Ngurchamliana, chuan Zonet JB Zawhna chhangin, Heng sipai pahnihte hi Hospital OPD an thlen hmain, Screening Point ah rinhlelh nghal an nih thu a sawi a. Screening Point ah rinhleh an nih avangin Sample laksak turin hruai hran nghal an ni a ti a. An chettlatna hmun zawng zawng pawh bawlhlo hmanga tih thinghlim nghal a ni a ti.

Hetih lai hian Zonet JB zawhna chhangin Lunglei Deputy Commissioner Office chuan Vanhne ramah BSF ten Quarantine Centre an siam tih BSF thuneituten Lunglei DC an hriattir lo tih an sawi a, Dan in a phut angin State pawn atanga lo haw, dah hran an awm tih Lunglei DC hriattir a ni lo tih an sawi bawk.

Chief Medical Officer Office Lungleia Senior Medical Officer pawhin BSF te hian Vanhne ramah Quarantine Centre an neih thu leh, Quarantine lai an neih thu engmah District thuneitute an hriattir lo tih Zonet JB zawhna chhangin a sawi a, hriattirna an dawn loh avanga an Swab Sample la lo an nih thu a sawi. SMO chuan Lungleia Assam Riffles leh BSF te hnenah Guidelines engkim pek vek an nih thu sawiin, Guidelines anga an kal loh chhan a hriat loh thu a sawi.

Medical team te chuan Vanhne rama BSF Transit Camp ah mi 25 la awmte Swab Sample hi an la nghal a ni. BSF Transit Camp awmna bul Sazaikawn VLTF te chuan, Tuna Transit Camp a awmte chu chaw an inpek dawn pawhin, anmahni kaltlang chauha inpe tur leh, a chhunga awmte, kawtkaia chhuak lo turin an hriattir a ni