Kawngpui chhia vangin Mizoram pumah Total Bandh huaihawt dawn

0
608
views

Mizoram hmun hrang hranga kawngpui chhia avanga mipuite thlavang hauh nan naktip, Ningani hian Mizoram pumah Total Bandh an huaihawt dawn tih vawiin khan MNF Action Committee Chairman, Pu Tawnluia’n Aizawl Press Club-ah a puang a. Kum 9 chhung zet, Congress-in sorkar a kaihhruai chhungin fur leh \halah Mizorama kawngpuite chu zawh tlak mumal a awm loh avangin mipuiten harsatna an tawk mek nia sawiin, Mizorama kawngpui, National Highway Kilometre 1,463 leh State Highway kilometre 4,731 a thui chu neitu awm lo ang maia a chhiat avangin mipui leh lirthei neitute mangangin hnatlangin an siam \hin a, kawng chhia avang hian hmun \henkhata khualzin phur lirtheite chu tlan ngam lovin an ding ta hial niin a sawi. Pu Tawnluia chuan, kum 2014 November ni 21-a MNF MLA Dr. K. Beichhua-a’n ‘Mizorama inkalpawhna kawngpui leh lei chhe lutuk hi tun aia chak zawkin siam \hat hnathawh ni rawh se’ tih leh kum 2015, October ni 16-a Opposition Group Leader, Pu Vanlalzawma, MNF MLA-in ‘mipuiten inkalpawhna kawngpui chhia avanga harsatna an tawh mek su kiang turin chak lehzuala hma lak ni rawh se’ tih Assembly House-a Private Member Resolution an put luh chu Congress MLA-ten an hnawlsak nia sawiin, kawng chhia avanga mipuite harsatna-in sorkar ngeng a chhun phak loh avangin MNF Party chuan kum 2015, October ni 13 khan kawng siam \hat phut nan kawng an lo zawh tawh a. Kawngpui siam \ha tur hian hun tam tak a awm chunga mipuite harsatna su kiang tura sorkar-in \an a lak loh avangin MNF Party chuan hreh tak chungin mipuite thlavang hauh nan Total Bandh hi a huaihawt dawn ta niin a sawi.

MNF Senior Vice President, Congress kaihhruai sorkar hnuaiah Vai Contractor-te an tlatlum hle nia sawiin, thawh sen loh hna an hmu a. Mizo Contractor-te hnawla hnam dang Contractor-te thlan an nih \hin chhan chu kawngpui siam \hat aia kawngpui a\anga sum siam an tum vang nia sawiin, Contract lian leh hlawk apiang vai kutah a lut zel a, an inthurual tlat avangin hna an thawh \hat leh \hat loh an enfiah \ha ngam lova, sorkar berin chhuanlam tur zawnpui chu hna berah a nei ta ringawt a. Lei dawh lai chim avanga nunna hial chan an awm pawhin sorkar-in hremna a lek ngam lova, hrem a hnekin Contractor-ten FIR an thehlut ngam zawk nia sawiin, hetianga Contractor-te nena inthuruala Contract hna hrang hrangah Revised Estimate an siam \hin avang hian India Express-in State hrang hrang CM hausa zual 10 a thlan chhuah zinga Pu Lal Thanhawla a tel ve chu a dik ngei an rin thu leh Mizorama mi hausa ber chu Pu Lal Thanhawla a ni tih phat chi nia an ngaih loh thu, Pu Tawnluia chuan a sawi.

Mizorama kawngpui chhiat chhan chu MNF-in an sorkar laia Contractor-te hnena za a 3 an khawn vang nia CM, Pu Lal Thanhawla’n a sawi chungchangah MNF hotute chuan, Contractor-te hi zaa 3 an khawn lo niin an sawi a. Lawmthu sawina atan za-a 3 thawh theihte chu thawhtir an ni a, pe leh pe lo eng emaw zat an awm niin an sawi. Total Bandh hi naktip, Ningani, zing dar 5 a\anga tlai dar 5 thleng a ni dawn a. Bandh hian chanchinbu mi leh a semtu, damdawi in hnathawk, tui sem, bawnghnute sem, P&E Emergency Duty leh damlohna avanga damdawi in pante a huam dawn lova. Thlawhna hmanga zin turte chu zing dar 8:30 hmaa Lengpui \um hmun thleng vek tura ngen an ni a, chhungte hmuak turte pawh zing dar 8 hmaa Aizawl chhuahsan hman vek tura ngen an ni.