Kolasib leh Bairabi inkar kawng siam that dan tur ruahman

0
544
views

PWD (Highway) Chief Engineer, Pu K. Lalsawmvela leh senior officer dangten nimin khan Kolasib leh Bairabi inkar kawng chhe tawh lutuk nia sawi chu en fiahin, a siam that dan tur an ruahman. Chief Engineer chuan he kawnga lirthei khalhtuten harsatna an tawh chhan ber chu ruahtuiin kawng chhuat lei a chiah nem avanga kawng khuar leh nal a ni a, hei hi siam tha turin lung tam tawk mamawh a ni a, tunah hian a bul hnaia quarry neiten he kawng siamna atan hian lung an pek theih loh avangin harsatna an tawk niin a sawi a, hmun hrang hrang atangin kawng siamna tur lung pe thei tur zawn a ni a, Assam lama quarry neite pawh biak pawh an ni a, tunah hian beihpui thlaka kawng chhe zual laia lung phah thuai tura tan lak nghal niin a sawi. Zawhna chhangin PWD Chief Engineer chuan he kawng hi a chhia-in a khuar nasa hle niin a sawi a, amaherawhchu, an mamawh ber, kawng khuar hnawhna tur lung rang taka hmuh theih a nih loh chuan hna an thawh chak theih loh a hlauh thu a sawi a, he kawnga buhfai phurtu, Mizoram Truck Owners Association leh Mizoram Truck Drivers Association-in tun thla ni 10 ral hmaa he kawng hi siam that a nih loh chuan buhfai phur tura tlan tawh loh an tum chu an thulh theih nan tunah hian theihtawpin tan an la niin a sawi a, rang taka lung tam tawk supply-tu tur an hmuh theih loh avanga hna an thawh chak theih loh pawhin an dinhmun hriat thiampui turin motor neitu leh khalhtute a ngen a ni.