Kumin July ni 18-a ACB-a FIR thehluh chu CM-in vawiin thlengin chhui phalna a la pe duh lo- BJP

0
297
views

BJP Mizoram Pradesh-in Congress MLA 9-te hausak dan chhui tura kumin July ni 18-a ACB-a FIR an thehluh chu Vigilance Department enkawltu CM, Pu Lal Thanhawla’n vawiin thlengin chhui phalna a la pe duh lo niin an sawi a. Eirukna laka a kaihhruai sorkar fihlim thu leh eptuten puh mawhna tur an hriat loh thu tlangaupuitu, Pu Lal Thanhawla chu a rang thei ang bera MLA te chhui phalna, ACB hnena pe tura an phut thu sawiin, tun hnuah chuan Police-te kut phuar tawh lo turin an ngen tih an sawi. BJP Mizoram Pradesh chuan, Mizoramah hian Minister leh MLA te chu an dik lohna hai chhuah theih a ni ve reng reng lo nia sawiin, rorel lai nih avanga thil tihsual ve theih loh ringawt chu ram hmangaihtu tan thlir liam mai theih a ni ta lo niin an sawi a, Mizoramah dikna tun din a nih theih nan BJP chuan chak takin hma a la dawn tih an sawi. BJP thuchhuah tarlan danin, MLA 9-te hausak dan chhui tura BJP-in ACB-a FIR a thehluh hi ACB chuan chak takin a bawhzui a, August ni 28 khan Vigilance Department-ah MLA 9-te chhui phalna a dil a, Vigilance Department hian tun thlengin phalna a la pe lo a ni. BJP-in MLA, an hausakna pung chak lutuk nia a tarlante chu – Chief Minister, Lal Thanhawla, Supply Minister, Pu John Rotluangliana, Social Welfare Minister, Pu PC. Lalthanliana, Agriculture Minister, Pu KS. Thanga, Pu Hmingdailova Khiangte, Pu K. Lalrinthanga, Pu Lalrobiaka, Pu H. Zothangliana, leh Pu Lalrinmawia Ralte an ni.