AMC inthlanna neih tura Hmeichhe Ward tur hi vawiin khan State Election Commssion kaihruaiin Tuikhuahtlanga Central YMA Hall-ah pawh a ni a, Hmeichhe Ward atana pawh Ward No. 3 hian Ramhlun North, Ramhlun Venglai, Ramhlun Vengthar, Ramhlun Sports Complex leh Laipuitlang a huam a. Ward No. 7-in Armed Veng, Armed Veng South leh Chite, Ward No. 10-in Chawnpui, Zotlang, Zonuam leh Govt. Complex, Ward No. 14-in Khatla, Khatla South leh Mission Vengthlang, Ward No. 16-in Bethlehem, Bethlehem Vengthlang leh College Veng leh Ward No. 19-in Kulikawn, Tlangnuam, Saikhamakawn, Melthum leh South Hlimen te a huam a ni.
Ram Danpuiin hmeichhia te ram leh tualchhung inrelbawlnaah seat awm zawng zawng atanga zaa 33 a zuahsak angin Ward 19 awmna AMC-awh pawh hmeichhiate tan Seat 6 zuah sak a ni a, kumina AMC inthlan neih tur hi a tum 3-na a ni a, AMC a Ward awm zawng zawng 19 zingah Ward No. 5-na Chanmari, Zarkawt leh Electric Veng chu hmeichhe Ward-a thlan loh awm chhun ala ni a, AMC inthlan leh hmasa berah Hmeichhe Ward a tan hauh nghal a ni.
AMC-a hmeichhe Ward tur pawhnaah hian Mizoram State Election Commissioner, Pu Laima Chozah chuan, COVID-19 hri leng vangin AMC inthlanna neih hun tur hi sawi lawk theih ni lo mah se, Hmeichhia te tana seat zuahsak tur thlanna chu a dan pangngaia tih a tul a ni a ti a. AMC term kallai hi kuminah a tawp dawn avangin kumin kum tawp lamah inthlanna hi neih beisei a ni.
Vawiina AMC a hmeichhia Ward tur thlannaah hian Aizawl Dawrhsap, Pu Vanlalngaihsaka leh AMC Commissioner, Pu K. Laldingliana bakah UD&PA leh GAD Department aiawh te; political party aiawh te leh MHIP, MUP leh MPF hruaitu pakhat theuh an tel a ni.
