Pu T Zakunga hian Congress legislature party member nilai, amah an thlawpna hnukdawk ta mi pali, Pu V Zirsanga, Pu VL Hmuaka, Pu Lallawmsanga Apetow leh Pu ST Laldailova leh Independent-a thlantlin MDC Pu LR Dingliana Chinzah te thil tih dan chu LADC inkaihhruaina, Lai Autonomous District Council (Constitution, Conduct of Business, Etc.) Rules 2010 hnuaia Sub-rule (6) clause (a) (b) leh (c) te bawhchhiatna a ni a ti a, he dan sub rule-7 in a tarlan angin heng MDC te hi bantir tur an ni a, Governor chu heng MDC te bantir turin a ngen a ni.
Member 25 awmna Lai Autonomous District Council-ah hian Congress Member 4, MNF Member 8 leh Independent member 1 ten United Legislature Party an din a, an hruaitu Leader atan Pu V. Zirsanga leh Deputy Leader atana Pu Manghmunga Chinzah te an thlang a ni.
Hetianga Congress MDC ten CEM nilai an thlawpna an hnuhdawh tak avang hian LADC-ah hian Pu T. Zakunga kaihhruai Congress Legislature Party chuan Member 12 chauh a nei ta a, United Legislature Party hian Member 13 neiin, LADC-ah sorkarna siam thei khawp Member an nei ta tihna a ni.
