Lunglei-a dah tur RT-PCR khawl thar, Pu Zodintluang’n MLA Fund hmanga a lei hi Lungleia dah ngei an duh tih Lunglei Thalai Pawl chuan an sawi.

0
130
views

Lunglei Thalai Pawl hian Lunglei mipuite hriselna chungchang inkhelhna tawk leka ram hruaitu thenkhat ten an ngai chu vanduaithlak an tih thu leh an dem thu an sawi a, Lunglei thatna tur an ngaipawimawh ber tih sawiin, Lunglei ah RT-PCR khawl chu dah ngei ni se an duh tih an sawi a, a rang lam a dah a nih loh chuan a tul anga hmalak zel an hreh dawn lo tih an sawi. Lunglei Thalai Pawl hian Lunglei thatna turah chuan thil dang dah tha veka tanrual puiah Lunglei mipui te an sawm tih leh Lunglei tana harsatna thlentu reng reng chu lungrual taka dopui zel tur in an sawm tih thuchhuah an siamah an tarlang a ni.

Lunglei Thalai Pawl hian Thorang bialtu MLA, Pu Zodintluanga’n Lunglei tana RT-PCR khawl a pek leh a hnua thu in chuh kal chho zelah Lunglei Civil Hospital-a Medical Superintendent leh Microbiologist te, High Powered Committee (HPC) Vice Chairman te, Deputy Commissioner te, MNF Sub-Hqrs. hruaitute leh Congress Party aiawhte an kawm kual thu leh an thusawi tlangpuite an thuchhuah siamah hian an tarlang tel a ni.

Congress Legislature Party leader Pu Zodintluanga’n MLA Fund hmanga a lei, Coronavirus kai leh kai lo endikna khawl, RT-PCR hi Zirtawpni kalta khan Lunglei District Level Task Force Chairman, Bawrhsap Pu V.Lalsangliana hnenah a hlan a, Civil Hospital-a hlan thlak anih hnuah DC Office ah phurh let leh a ni a, hemi chungchang hian sawi zui a hlawh hle a, Lunglei-ah he khawl hi bun mai theih a nih leh nih lohah inhnialna a la kal tluang chho zel a ni.