Mizoram chhim lam District pathum Lunglei, Lawngtlai leh Siaha tlawha zin Mizoram Chief Secretary, Pu Arvind Ray, chuan nimin, Pathianni khan Lunglei a thleng. Additional DC, Pu Benjamin Lalzama, DRDA Project Director, Pu K. Lalrohlua, 2nd Bn MAP Commandant, Pu C. Lalruaia leh sorkar official dangten an lo dawngsawng a, hemi hnu hian Circuit House-ah an inkawm ho a ni. Lungleia a cham chhungin Pu Arvind Ray hian hmasawnna tura hnathawh hrang hrang a hmunah a en a, Dan leh thupek kenkawh kawnga harsatna lian tham awm lo chu lawmawm a tih thu a sawi a, hmasawnna atan zirna leh hriselna a pawimawh hmasak thu a sawi bawk. Chief Secretary hian Lunglei District-a mipuite hriselna dinhmun te, damdawi ina khawl awm te, faina kawnga hmalakna te, zirna dinhmun te, kawlphetha mipuite pek dan te, tui thianghlim in tur pek dan te sorkar hnathawkte chu zawtfiahin an dinhmun \heuh a thlirletpui a ni. He inkhawmah hian sorkar officer te chuan harsatna an tawh te Chief Secretary chu an hrilh a ni. Nimin vek khan Chief Secretary hian Lena Stadium Serkawna sak mek leh State Sports Academy Zobawka sak mek te a hmunah a tlawh a, a sak hna thawh enkawltu officer ten lo dawngsawngin thil awmdan an hrilhfiah a ni. Mizoram chhim lam tlawha Chief Secretary zin hian Inrinni khan Lawngtlai leh Siaha a tlawh a, Lawngtlaiah Bawrhsap Pu N. Chakhai leh officer dangten an lo dawngsawnga, Circuit House Conference Hall-ah inkawm hovin hmasawnna hna thawh dan an thlirlet a, officer te chuan harsatna an neih te Chief Secretary an hrilh a ni. Chief Secretary hian zirna, hriselna, kawlphetha pek dan leh mipuite tui thianghlim in tur pek dan a ngaih pawimawh thu sawiin, an hnathawh dan a thlirlet pui a ni.
