MHIP Day champha vawi 44-na chu vawiin khan Mizoram pumah hmeichhiate leh mipuite hamthatna hawi zawnga hman a ni

0
664
views

MHIP Day champha vawi 44-na chu vawiin khan Mizoram pumah hmeichhiate leh mipuite ham\hatna hawi zawnga hman a ni. He ni hi Branch hrang hrangte chuan anmahni Branch huam chhung \heuhah an remchan dan angin an hmang a, Headquarters-a an hruaitute leh mi pawimawh dangten hmun hrang hrangah MHIP Day hi an hmanpui a ni. MHIP hi kum 1974, vawiin angah khan Society Act 1860 hnuaiah inziak luta din a ni a, Treasury Square Aizawlah Hqrs. neiin hmeichhiate ham\hatna tur leh khawtlang tana thil \ha tur tiin chak takin an ding chho zel a, tunah hian Lunglei, Saiha, Lawngtlai, Serchhip, Champhai, Kolasib leh Mamit-ah te Sub-Headquarters neiin an awm a, veng hrang hrang leh khaw hrang hrangah Branch an nei a ni.

Aizawl Electric Veng MHIP-in MHIP Day champha vawi 44-na an veng YMA Hall-a an lawmna chu bialtu MLA, Health Minister ni bawk, Pu Lal Thanzara’n a hmanpui a. He ni lo thleng hian hmeichhiate chu chhungkua leh khawtlanga an pawimawhna hriat thar tir tur leh nu \ha, mo \ha leh fanu \ha nih tum thar \heuh turin a chah a ni. Pu Lal Thanzara chuan nute rawngbawlna hmasa ber leh pawimawh ber chu chhungkua a ni tih sawiin pawn lamah nuten hun tam zawk an hmana, in lam an ngaihthah chuan chhungkua a buai \hin tih hre turin a chah bawk. Electric Veng Branch MHIP hian an member kum 70 tling chin mi 117-te an chawimawi a. MHIP General Headquarters-a Adviser, Pi Vanlalruati hovin kumpuan an zir hova, President, Pi Saipuii thuchah chhiar chhuah a ni bawk.

MHIP Day pual hian Electric Veng MHIP-in dan kalha zawrh Gutkha a\anga thil siam an man engemawzat chu Pu Lal Thanzara nupui Pi Zohmingthangi Sailo-in a hal a, chungte chu shikhar bawm 7, SS I bawm 8, S 10 packet 187, Rajnigandha packet 52 leh Raja tobacco packet 14 a ni.

Aizawl Khatla Branch MHIP pawhin MHIP Day hi an veng YMA Hall-ah awmni khamin an lawm a. Nikum leh kumin MHIP Day inkara an member chatuan ram pantate an sun bakah Section hrang hrangte chu Zaipawl hmangin an intihsiak a, intihhlimna chi hrang hrang an entir bawk. Khatla Branch MHIP hian Aizawl Police Station a\anga ngenna an dawn angin naupangte chunga mipat hmeichhiatna lama hleilenna tibo tur leh hetiang laka inven dan tur an zirtir bawk. Khatla Branch MHIP hian tukin khan hnatlangin an veng chhung hmun pawimawh laite an thianfai a, MHIP enkawl ‘Hmangaihte Run’ \anpui nan pawisa fai Rs.5,000/- an pe bawk. Khatla Branch MHIP-ah hian member 1,350 awmin, section parukah an in\hen a ni.

 

Mission vengthlang Branch MHIP chuan MHIP Day hi Synod Higher Secondary School Hall-ah an hmang a. A hmanpuitu Bialtu MLA, Pu Vanlalzawma chuan mi \henkhatin tlawmngai pawlte thil dil pawl tia an sawi \hin chu thudik lo a ni tih sawiin mi inphal te hnenah thil dil chang nei mah se anmahni mimal hlawkna tura dil an nih loh thu leh midang tana thil \ha tihna atan an hman zel zawk thu sawiin, thil dil pawl anga an sawi \hin chu rilru tihnat phah nana hmang lo turin a fuih a ni. Pu Vanlalzawma chuan, hmeichhia te chu mipa te tih theih ang zawng zawng ti thei lo mah se ram leh hnam khawtlang \hatna tur atan nasa taka tha thawh thei an ni tih hre reng turin a fuih a ni. Pu Vanlalzawma chuan Mission vengthlang MHIP ten MHIP day lawmna thingpui senso atan Rs.5,000/- a pe a ni.

Inkhawm hi an pawl President, Pi R Zaikhumi’n a kaihruai a, an pawl member thi te s<nna an neih bakah an member kum 80 chunglam te, kum 1980-2016 inkara hruaitu lo ni tawh leh kumin chapchar kut lady te an chawimawi a ni.

Mission Veng chuan MHIP Day hi Synod Conference Center-ah an hmang a, hetah hian bialtu MLA, Col. ZS Zuala leh Mizoram State Women Commission Chair Person, Pi Margaret Zohmingthangi te pawh an tel a ni. Fuihna thusawiin Col. ZS Zuala chuan hmeichhia te chu khawtlang tan leh hmeichhe tana an hmalakna chak taka chhunzawm zel turin a chah a, hma an sawn theih nan sorkarin Village Council leh Local Council-ah te duhsakna pe-in chanvo a siam sak a, Mizoram Assembly pawhin an ham\hatna lam nasa takin a ngaihtuah niin a sawi bawk. Mizoram Women Commission Chair Person, Pi Margaret Zohmingthangi pawhin MHIP member te chu zing an thawh hlim a\anga zan thlenga an chhungkhaw tan te, Kohhran leh ram tan te Lalpa auva \awng\ai \hin turin a fuih a ni. He ni hmanna inkhawm hi an Branch President, Pi Lalnipuii’n a kaihruai a, hetah hian MHIP Hqrs. Vice President, Pi Hmingliani pawhin thu a sawi bawk a ni.

New Secretariat-a Khatla West MHIP pawhin MHIP Day hi ATI Auditorium-ah an lawm a, a lawmna inkhawm an pawl President, Pi Lalrinawmi kaihhruaiah MHIP Gen. Hqrs. President, Pi Saipuii thuchah chhiarchhuah a ni a, an Branch huam chhunga upa te an chawimawi a ni. A hmanpuitu Bialtu MLA Pu Vanlalzawma chuan Khatla West Branch MHIP chu Branch naupang te nimahse kawng hrang hrangin hmeichhia te hmasawnna atan an thawk thei a ni tih a sawi a, MHIP chu hmeichhia te himna tura tha thawhtu an nih angin theihtawp chhuah zel turin a chah.

Khatla South MHIP Branch pawhin an veng YMA Hall-ah MHIP Day hi an lawm a, Bialtu MLA, Pu Vanlalzawma leh North East Consultancy Service hotu, Pu Robert Romawia Royte ten an hmanpui. Chawhma lam inkhawm hi an pawl President, Pi Darhmingliani’n a kaihruai a, an pawl member thi te an s<n bakah Gutkha Product an man khawm te an hal a, an Veng Local Council aiawh leh Branch YMA aiawhten thu an sawi bawk. Chawhnu lamah intihhlimna an neih bakah tlaiah ruai an \heh a ni.

Deputy Speaker, Pu R. Lalrinawma chuan Sihphir Community Hall-a a hmannaah thu sawiin, hmeichhe pawl inzawmkhawm lian ber MHIP-in anmahni ham\hatna chauh ngaihtuah lova vantlang mamawh thil chi hrang hrang leh hmeichhia te dinhmun siam\hatna kawnga hma a la \hin chu thil lawmawm niin a sawi a, The Mizo Marriage, Divorce & Inheritance Act, 2014 chu sorkarin a siam chu hmeichhia te chanvo dik tak pek an nihna tur niin a sawi a ni. Deputy Speaker chuan Mizo tlawmngaihna te, inpumkhatna te, aia upa zahna te \hangthar ten an vawn nun zel theih nan chhungkaw nu ber te chu \an la turin a fuih bawk a ni.

Kolasib Vengthar Community Hall-a MHIP Day hmanna inkhawmah thusawiin bialtu MLA Pu PC Zoram Sangliana chuan MHIP chu an din chhan hre renga hmeichhia, nunau leh tleirawl \anpui ngaite \anpui chhunzawm zel turin a fuih a, Kolasib District chu HIV/AIDS hluarna a nih avangin MHIP ten tih tur tam tak an nei niin a sawi a, hmeichhia te bakah mipa te pawhin anmahni nundan \heuh enfiaha, nunkawng dik an zawhna theih nan kaihhruaina pe \hin turin a fuih a ni. Pu PC Zoram Sangliana hian MLA fund hmanga Kolasib Vengthar MHIP building sak thar a hawng nghal a, Vengthar Branch YMA building sak nan MLA fund cheng nuai 1 a pe bawk a ni.

Muthi Branch-in MHIP Day an lawmna chu Vanglai Editor, Pu K. Sapdanga’n a hmanpui a, an pawl dinchampha vawi 40-na puala lung an phun a hawng bawk. A lawmna inkhawm Muthi Community Hall-a neihah thusawiin Pu K. Sapdanga chuan pawl leh mimal anga mi dangte \anpui theitu nih chu Pathian a\anga malsawmna dawn ropui tak niin a sawi a, hlawhtlinna tluantling nei turin taimakna, rinawmna leh Pathian thuawih a ngai a.
Midangte \anpui theitu nih tum zel turin MHIP member-te chu a fuih a ni. Muthi Branch MHIP-in an pawl dinchampha an lawmnaah hian an khuaa MHIP dintu leh President hmasa ber, Pi Rimawii, kum 87 leh hruaitu hlui dangte hnenah Jubilee pualin thilpek an hlan a ni. He inkhawm hi an President, Pi Lalparmawii’n a kaihruai a ni.

South Vanlaiphai Branch MHIP pawhin MHIP Day hi an khaw Community Hall-ah an lawm a. He inkhawm hi an pawl President, Pi C. Sangpari’n a kaihruai a, hetah hian South Vanlaiphai khaw chhunga tlawmngai pawl hrang hrangte, VC leh Sorkar hnathawkte an tel a, tlailamah MHIP day lawmna ruai an kil ho bawk.

Khawzawlah chuan MHIP Day hi Khawzawl Joint MHIP bultumin Zaingen YMA Hall-ah hman a ni a, hetah hian bialtu MLA, Pu Lalrinliana Sailo chuan thusawiin MHIP member te chu chhungkhat nu ber, mahni chhungkaw enkawlna atan leh khawtlang nun siam \ha tura mawhphurhna sang tak nei an ni tih a tarlang a ni. He inkhawm Khawzawl Joint YMA President, Pi B. Lalmuanpuii kaihhruaiah hian Pu Lalrinliana Sailo chuan MHIP Member upa zual 14 thlanchhuah te hnenah puan a hlan a, hmeithai upa zual thlanchhuah 12 te hnenah hmanrua a pe a, hmeithai chhungkaw 5 hnenah in chung tur rangva bundle 4 \heuh a pe dawn tih a sawi bawk a ni. Khawzawla MHIP Day lawmnaah hian thupui atan, ‘Faina leh thianghlimna’ tih hman a ni a, he thupui hi Pu Roluahpuia’n a sawi a ni.