Mizoram-a district hrang hrangah Martarte Ni hmang

0
356
views

MNF party-in vawiina Martarte ni a hman chu District khawpui leh Sub Division hmunah pawh vawiin khan hman a ni. Siahaah chuan he ni hi MNF Office Hnam Runah Siaha District MNF President, Pu N Viakhu hova hman a ni a, Tipa Sub Divisional Hqrs.-ah pawh National Executive Member, Pu Lalmalsawma Zasai hova hman a ni a, a hmanna inkhawmah hian zalenna an sual laia thi ta te sunna hun hman a nih bakah hnam tana inhlan thar leh turin an party hruaitute chuan party mi kal khawmte an fuih a ni.

Lawngtlaiah chuan Bazara an District Hqrs. Office-ah District President, Pu Manghmung Chinzah hova hman a ni a, an party Vice President, Pu H.Lalbiakzauva’n kaihruaiin, Pu Manghmung Chinzah chuan Mizote zinga Mizo nationalism lo pian chhoh dan te, Mizo hnam movement lo chhuah dan leh ram tana nun hlantu tam tak an awm dante a sawi a, nunna hlu tak hlantute chu Mizoram awm chhung chuan mipuite thinlungah an thi tawh dawn lo niin a sawi.

Lungleiah chuan he ni hi MNF Party office Hnam Runah an Party President, Pu Zoramthanga hova hman a ni a, inkhawm hi Lunglei Sub Hqrs. MNF President, Pu Lawmawma Tochhawngin a kaihruai a ni. Pu Zoramthanga chuan Mizo hnam tana nun hlantute hlut dan chu chhut chhuah theih rual loh a ni tih sawiin, an thisena a man an pek chu Zofaten a man an pek ve a ngai niin a sawi a, Mizoram sorkar, Pu Lal Thanhawla kaihhruai chu ram, hnam leh Pathian pawi sawi nia sawiin, hengte avang hian kum 2018-a inthlannaah an tla dawn niin a sawi a, MNF sorkar laia sum hman tur an neih let 6-a tam an nei chungin hmasawnna hmuh tur a awm lo niin a sawi bawk. He inkhawmah hian Mizo hnam movement avanga thi ta te sunna hun hman a ni a, President leh hruaitu dangten Martarte zahna pangpar an dah bawk a ni. Hemi bakah hian tukin khan veng hrang hrang thlanmuala an thlanah te pangpar dah a ni bawk.

Sialsuka Martar te ni hmanna inkhawmah an party Vice President, Pu R. Tlanghmingthanga chuan nun hlantute chibai bukin nunna hlantute chu theihnghilh an ni ngai dawn lo niin a sawi a, hnam damna duhtute Pathianin a siam anga an awm theihna tura inngaihtuah chiang turin mipuite a chah a ni.

Hnahthial Market Building-a Martar te ni hmanna inkhawmah an party Vice President, Dr. R. Lalthangliana chuan MNF party chu Mizo hnam hmahruaitu nia sawiin, zalenna an sual kawngah inchi khat pawhin an la tawlh lo niin a sawi a, Pathian hun tiam a la thlen loh avangin an thil tum chu an la thleng lo niin a sawi a ni. Dr. R. Lalthangliana hian tukin khan Hnahthial tlangval Captain Lalhleia thlan tlawhin zahna pangpar a dah a ni.

Kanghmunah pawh Martar te ni hi an party Treasurer Pu Vanlalzawma MLA hovin hman a ni a, Pu Vanlalzawma chuan ram leh hnam tana nun hlantute chu Mizo mipuiten an ngaisang zual zel dawn niin a sawi a, MNF-in zalenna a sual lo titute chu an inchhir hun a la thleng dawn niin a sawi bawk. Martarte ni hi Serchhip, Champhai, Kolasib, Mamit leh khaw dang tam takah vawiin khan hman a ni a, a hmanna inkhawmah Mizoram tana nunna hlantute zahna chibai bukin sunna neih a ni bawk.