Mizoram-ah ruihhlo ngai, Oral Substitution Therapy la mek mi 3062 an awm mek a, mipui kharkhipna thupek kenkawh mekah ruihhlo ngaite hian buaipui an hlawh hle.

0
16
views

Ruihhlo ngaite zingah mipui kharkhipna thupek avanga ruihhlo zawnga ramri kan leh ramri kan tum mi 100 deuh thaw chu tunhnai khan Kolasib District ah enkawl an lo ni tawh a, heng mite hi Thingdawl Polytechnic Building ah khung hrangin District thuneitute chuan an lo buaipui hle tawh a ni.

Ruihhlo ngaite hi ruihhlo-a an inchiu chuan, hriau thianghlim lo atangin natna hlauhawm dang, HIV leh a kaihhnawihte an kai awlsam a, inchiu lova an awm theihna turin Oral Substitution Therapy, OST pek thin an ni a, Mizoram State AIDS Control Society chuan Mizoram chhung centre hrang hrangah OST centre thahnem tak a nei mek a. Doctor te vilna hnuaiah counselling mumal tak pe-in ruihhhlo ngaite hi OST pek thin an ni.

OST la mek hi Aizawl District ah mi 1166, Champhai-ah mi 273, Kolasib-ah mi 277, Lawngtlai-ah mi 157, Lunglei-ah mi 297, Mamit-ah mi 358, Serchhip-ah mi 164 leh Siaha-ah mi 370 an awm mek a ni.

Mizoramah hapta 7 chhung mipui kharkhipna thupek kenkawh a ni ta a, hemi hun chhung hian ruihhlo ngawlveiten OST centre an pan thei lo a, MSACS hnuaia OST pe chhuaktute chuan ruihhlo ngaite hi an chenna inah a theih ang anga kal chilhin enkawlna an pe chhunzawm a ni.