Mizoram Assembly inthlanpui tun thla ni 28-a neih tur atan Mizoram Pradesh Congress Committee President, Pu Lal Thanhawla’n vawiin khan Vanapa Hall-a inkhawmah an Party Manifesto a tlangzarh.

0
324
views

 

Congress Party Manifesto-ah hian HSLC leh a chunglam pass tawh, eizawnna ngelnghet nei lo zawng zawng hnenah laptop pek tiam a ni a, NLUP leh NEDP chhunzawm tum a ni tih tarlan a ni bawk. An Manifesto-ah hian an ngaihpawimawh thil chi hrang hrang 21 tarlan a ni a, chung zingah chuan thingtlanga cheng mi retheite in sakna tur scheme siamte, Mizoram State Health Care Society leh sorkar laipui Health Care Scheme, Pradhan Mantri Jan Arogya Yojana kaihfina cheng nuai 5 thleng dil theihna awm bakah mi zawng zawng huap tur zawnga siam belhte, natna khirh zawk tuarten cheng nuai 5 aia tam an bill theih dan tur ruahmansak te, MIMER chu Doctor zirna \ha ber zinga tel tura siamte, pianphunga rualbanlo, fahrah, hmeithai leh vanduaina tawkte chhawmdawlna tam zawk pek te, College leh University-a zirlaite excursion leh study tour neihna tur sum budget-a dah te, ruihtheihthil vanga harsatna tawkte enkawl kawnga kohhran leh tlawmngai pawlte hnathawh bakah a enkawlna hmun Rehabilitation Center changtlung tak din te, kawlphethaa intodelhna tura Hydel Project siam bakah ni zung chakna hmanga kawlphetha tam zawk siam chhuah te, \halaite tan lirthei hmanga infiamna, motor sports lama hmalakte, heta tana Racing Track siamte leh Central sorkarin Working Journalists and Other Newspaper Employees Condition of Service Act, 1955 a siam chu Mizorama hman rei theih loh a nih avangin Mizoram Journalists ten ham\hatna an hmuh theihna turin dan ennawn te a tel a ni.

He inkhawm hi Adviser to Chief Minister, Pu Lalrinmawia Ralte MLA, Campaign Committee Vice Chairman ni bawkin a kaihruai a ni.