Mizoram hmun hrang hrangah ruah sur nasa vangin in chhia leh lei min awm

0
855
views

Nizan ruahsur nasa tak avang khan Mizoram hmun hrang hrangah in chhia leh lei min a awm a, hmun hrang hrang atanga ZONET thu dawn danin kha ruahsur avang khan Saberekakhuangkaih insiamin Phunchawngah in 5 leh Biak in 1 a tichhia a, heng zinga pakhat chu kawng thlang lamah hnawlin, a dang 4 chu luah tlak lohin a tichhia a, vanneihthlak takin mihring thi leh hliam na lutuk erawh chu an awm lo. Phunchawng Branch YMA President, Pu Vanlalhlimpuia hnen atanga thu dawn danin Saberekakhuangkaihin kawng thlang lama in a hnawl hi Assam type, Pu Lalawmpuia te chhungkaw luah lai a ni a, an kawmchhaka in pakhat, rauhsan tawh chu Saberekakhuangkaih hian a rawn hnawl hmasa a, a thawm hriain Pu Lalawmpuia te chhungkua hi an tlan chhuak a, a hnuah Pu Lalawmpuia leh an thenawm tlangval chu bungrua chuh tumin an tlan lut leh a, hetih lai hian a rawn hnawl tel ta a, mahse vanneihthlak takin hliam na lutuk lovin a chhuak thei a ni. Pu Lalawmpuia te hian bungrua engmah an chuh hman lo a ni. Hei bakah hian Saberekakhuangkaih hian in dang pawh a tichhia a, heng zinga 4 chu luah tlak loh a ni a, in chhungah chirh leh bawlhhlawh a luh nasat avangin, in chhung bungrua engemawzat a chhiat bakah an vawk vulh lai 2 chu chin hriat lohin a awm bawk. UPC North East India Biak in pawh Saberekakhuangkaih hian luah tlak lovin a tichhia a, Biak in hi a awn a, a bang a chhiat bakah a chhungah chirh a luh avangin bungrua a chhe nual bawk. He thil thleng hi an hriat veleh khawtlangin a theih ang angin an buaipui nghal a, vawiinah khan nileng hnatlang an nei bawk. Bialtu MLA, Pu K Sangthuama’n hnatlang thingpui lumna atan pawisa leh silpoulin a pe a, Aizawl Bawrhsap pisa atang pawhin thil thlen dan hi enfiah nghal a ni a, MHIP General Headquarters hruaitute leh Hunthar Branch YMA pawhin hnatlang thingpui lumna tur an pe bawk.

Nizan ruahsur avang vek khan Dawrpui Vengthar Presbyterian Kohhran Biak in bula tuiluankawr chu bawlhlawhin tui luang thei lovin a hnawh a, hei vang hian kawng dungah tui a luang a, he tui luang liam hi Minister hlui, Pu C Vulluaia te in chhungah nasa takin a lut a, ngal thlengin in chhungah tui a tling a, thil tihchhiat erawh chu a nei lo a ni. Dawrpui Vengthara Pu V Lalsawmliana te in chunga tuizem pawh an kawmchhak lei min leh lung tla-in a delh chhia a, lei hian in bang a tihkhik bakah in chhungah chirh a lut nual a, thil dang tihchhiat erawh chu a nei lo a ni.