Salvation Army hotu lu ber dawttu zan thum riak turin Aizawl lo thleng

0
410
views

Khawvel puma Salvation Army hotu lu ber dawttu, Chief of The Staff, Commissioner Brian Peddle chuan zan thum riak turin vawiin khan Aizawl a lo thleng a, Lengpui tumhmunah India Eastern Territory-a Territorial Commander, Commissioner Lalzamlova leh thawhpuite leh an pawl miten an lo dawngsawng a ni. A ruala lo kal ve tura beisei, a nupui, World Secretary for Women’s Ministries, Commissioner Rosalie Paddle erawh chu a pa-in a boralsan avangin a vui turin Newfoundland, Canada a pan ta nia thu dawn a ni. Chief of The Staff hian naktukah Ramhlun Corps-ah Territorial Officers Council a hmanpui ang a, Inrinni zan Tawngtai inkhawmah Bethlehem Corps-ah a tel ang a, Pathianni chawhmaah Aizawl Temple Corps-ah Territorial Commander, Commissioner Lalzamlova leh Territorial President of Women’s Ministries, Commissioner Nu-i chu an hna thawk tur hian dah ngheh an ni a, chawhnu-ah Local Officer thlan chhuahte nen an inkawm ang a, Pathianni zan Chhandamna inkhawm chu Bazar Corps-ah an hmang dawn a ni. Chief of the Staff hi London-a Salvation Army International Headquarters-a General Andre Cox tha chhang dawltu ber a ni a, Chief of the Staff 26 awm tawh zingah Mizorama rawn tlawh hmasa ber a ni.