Mizoram Larsap Pu P.S. Sreedharan Pillai a’n a hlawh pum atanga zaa 30 chu covid-19 dona turin thla 6 chhung Chief Minister’s Relief Fund ah a chhung dawn a. Sorkar sum renchemna turin Raj Bhavan sum hman tih tlemna tur ruahmanna a puang bawk.

0
49
views

May thla hlawh atanga October thla thlengin Larsap hian a hlawh pumpui zaa 30 hi a pe ang a, thlatina a chhunluh tur hi Rs. 1,05,000/- a ni a. Hei hi thla 6 hnuah a ennawn leh dawn a ni.

Mizoram Sorkar sum renchemna turin Larsap hian Raj Bhavan enkawlna senso ti hniam tura hmalak dan tur engemawzat a puang bawk a, kum 2020-21 chhungin hmasawnna ruhrel thar Raj Bhawan ah din a ni dawn lo a, Raj Bhawan cheithat hna leh enkawl hna pawh a tul tak tak chin chauh thawh a ni ang a, office bungraw thar, furniture, computer, electronic lam chi te pawh tul bik a nih loh chuan lei loh tur a ni a, thawktute pawh tui leh electric te renchem taka hmang tura tih an ni a, Raj Bhawan hman tur lirthei thar lei loh tur a ni bawk a, amah Larsap pawh a tlem thei ang ber a zin chhuak ang. Ram ni pawimawh bik-a Larsap in sawmbikte puala thinpui a buatsaih thinah pawh a tel tur a tlem thei ber sawm an ni ang a, eitur pawh a hautak loh thei zawnga buatsaih a ni ang.