Rajya Sabha MP nilai Pu Ronald Sapa Tlau chu thla thar July ni 18-ah a hun a tawp tawh dawn avangin, Mizoram aiawha Rajya Sabha member tur thlanna tun thla ni 19 khian neih a ni ang.

0
184
views

Council of States tia sawi bawk, Rajya Sabha member tur hi MLA ten an thlan chhuah thin a nih avangin dan tlangpuiin rorellai party in candidate an dah chu thlantlin an ni thin a, Mizoram aiawh-a Rajya Sabha Member ni lai Pu Ronald Sapa Tlau hi Congress sorkar hunlai kum 2014 khan thlan tlin a ni a, kum 6 term a ni.

Mizoram atanga Rajya Sabha Member tur thlanna neih turah hian Returning Officer atan Dy Speaker Pu Lalrinawma ruat a ni a, inthlanna neih anih tur thu hriattirna Notification chu vawiin khan a ti chhuak nghal a, chuh tumte tan June ni 9 thleng hming pekluh theih a ni ang a, inhnukdawk leh duhte tan June ni 10 thleng hun hawn a ni ang. June ni 19-a MLA ten vote an thlak hnuah hemi ni vek tlai dar 5 ah vote chhiar nghal a ni ang.

Rorellai party MNF hruaitute chuan Rajya Sabha member thlanna neih turah hian candidate tur ngaihtuahtu tur Nomination Committee an la din lo tih Zonet Zawhna chhangin an sawi a, an party inkaihhruaina danah nomination committee ah hian party Office Bearers te chu member ni sa an ni.

Mizoram rual hian Arunachal atangin member pakhat leh Karnataka atangin member 4 te pawh thlan an ni dawn bawk.