Mizoram mi, State pawn atanga lo hawte chu RT-PCR hmagin Laboratory-ah an sample endik vek a ni dawn.

0
83
views

Health Secretary, Pu H. Lalengmawia hnen atanga Zonet thudawn danin, Rapid Anti Body (RAT) hmanga endik zingah rinhlehawm nia lang lote pawhin Covid 19 an kai theih tho avangin he ruahmanna hi siam a ni a. RAT hmanga rinhlehawm hmuchhuak tur hian hri an kai atanga ni 7 tal a liam a ngai a, hemi a nih avang hian hri kai tharte chu RAT hmanga endiknaah rinhlehawm ni lo, Non-reactive angin a lang thei a ni a ti.

State pawn atanga lo hawte chu RT-PCR hmaga endik vek tura hriattirna hi vawiin khan Health Secretary-in a tichhuak a. Chumi ang chuan Quarantine hmuna awmte chu ni 14 chhung khunghran tur an ni a, Qurantine hun an hman zawh hnua mahni in lama an haw hnuah pawh tul bik thilah lo chuan khawlai leng chhuak lo turte, mahni dinhmun uluk taka inchik a, an taksaah thil danglam a awm a nih chuan Doctor hnenah emaw Sorkar-in Helpline a siamah emaw rang taka hriattir tur a ni. State pawn atanga lo hawte Sample endik turah hian Sorkar chu theih ang angin a inbuatsaih nghal tih Health Secretary chuan a sawi.

Nimina Health Minister-in Press Conference a neih tuma Laboratory thar neih tur a sawilan piah lamah tunkar chhung hian Manipur atangin Thlawhtheihna hmangin Laboratory pakhat lak tum a nih thu Health Secretary hian a sawi bawk.

Health Secretary sawi danin tun dinhmunah Mizoramin Test Kit 2,000 vel leh RNA Extraction Kit 700 a nei mek a, tunkar chhungin Test Kit hi 5,000 lo thlen belh tura beisei a ni a, RNA Extraction Kit pawh 2,000 lo thleng tur a awm bakah NHM lamin 500 a chah mek a, Test Kit leh RNA Extraction Kit hi Pooled Test Method hmanga tih theih a ni a, a awmzia Kit pakhat hmang hian Sample 5 zel entheih a nih avangin tuna neih sa leh lo thleng tur hmang hian sample thahnem tak endik theih a ni dawn a ni. Sample lakna hmanrua VTM chu tun dinhmunah 2,400 neih mek a ni a, tunkar chhungin 5,000 a lo thlen dawn bakah NHM lamin 5,000 dang an chah mek bawk.

Zawhna chhangin Health Department hotute chuan, tun hnaia Covid 19 kai thar hmuhchhuah takte bul hnaia awmte chu Health Department leh Police lama Contact Tracing Team-in an chhui nghal a, rel leh lirthei-a an chuanpui leh Quarantine Centre-a an awmpui thlenga chhui chhuah deuh vek an ni tawh a, heng mite pawh hi an sample endik vek a nih tur thu an sawi.

Quarantine Centre-a awm mekte chu an vaia RT-PCR test neihtir vek tum an ni dawn tih Health Dept hotute chuan Zonet zawhna chhangin an sawi a, quarantine-a an awm hun tur nei tlem tawhte chu test hmasak an ni ang a, a tah tawlin an vaia test vek theih an inbeisei tih an sawi.