Mizoram pawn-a tangkhang, Mizorama lo haw tur sum leh paia harsatna tawkte chu sorkarin an hawna man a tum sak ang a, sorkar tanpuina mamawh lo te chu mahni intum tura beisei an ni tih Chief Secetary Pu Lalnunmawia Chuaungo in a sawi.

0
115
views

Mizorama lo haw duh, India ram hmun hrang hranga tangkhang mi sing 1 sang 4 dawn sorkarah an in report tih Chief Secretary hian a sawi a, mi 800 chuang Chennai atangin Relin an rawn thleng tawh a, mi dang thahnem tak lirthei hmanga lo haw an awm tawh bawk a, tunah hian mi sing 1 leh za 5 vel lo haw duh an la awm mek tih a sawi.

Lo haw turte zingah Rel pakhata chuang tawk tur, mi 1500 bawr vel awmna Bengaluru atanga lo haw tur an la awm a, Mumbai, Delhi leh Goa bakah khawpui dang atanga lo haw turte pawh an la awm tih CS hian a sawi a, mizo awm tlemna hmuna mite chu thenawm state te nena intiam ruala an lo haw theih dan tur ngaihtuah mek a ni a ti.

Lo haw turte zingah mi thenkhat chu chhungkaw khawsak harsa lem lo, an kalna ngaihtuah sak ngai lo an awm laiin, thenkhat chu hnathawka awm, an chhungte pawisa thawnlet thin zawkte an ni a, hri leng vanga hna nei tawh lo, harsa tak tak te chu an hawna man tur sorkarin a tum sak dawn a, sorkar \anpuina mamawh lo te erawh chu mahni intum tura tih an ni tih CS hian a sawi.

Mizorama lo haw duh mi sing chuang an la awm laiin tun thlengin lo haw hlimte khung hranna tur hian mi 6000 vel awm theihna tur chauh hmuh a la ni rih tih CS hian a sawi a, Kohhran hrang hrangin mi 1800 chuang awm theihna tur an hall te hman an remti tawh a, heti chuang pawh hian quarantine-na tur mamawh a la phuhru zo lo a, school building te pawh hman dan en mek a ni a ti a, mahni in-a room hran leh bathroom hran nei theite chu mahni in lama an inkhung hran zel a that hmel a, hei hi mipuite pawhin an hriatthiam a tul a, fimkhur a ngaih rualin hlau tura inzirtir loh tur a ni a ti.

Veng thenkhat Home quarantine duh lo an awm chu pawi a tih thu CS hian a sawi a, Local task force te chu ngaihtuahna fim hmanga Mizoram mi leh sa hmundanga awm, kar tam tak harsatna tawk tawh leh hrehawm taka awm mek te chu tha taka lo dawngsawng turin a ngen a ni.

Rapid Test Kit sing 1 sang 3 naktukah Mizoramah phurh thlen a ni dawn tih CS hian a sawi bawk a, Mizorama lo haw turte chu Test Kit hmanga test zel an ni dawn tih a sawi.