Mizoram pawn atanga lo haw tur, sorkara in hriattir tawh hi mi 10,496 an tling tawh a. Lo haw turte hi an tam tham avang leh Mizoram puma sorkarin inkhung hranna hmun quarantine facility a neihah te an len loh avangin a tahtawla inhruai haw a tul dawn a ni.

0
333
views

Tun dinhmun-a Mizoram puma sorkarin inkhung hranna hmun a neihah te mi 4172 an leng a, khung hran mek, an hun la hmang zo lo mi 1,5 bawr an la awm mek bawk a. Quarantine facility awmsa ten lo haw turte a dawl zawh dawn loh avangin mahni chenna in-a chenpui te tawmpui loh bedroom leh bathroom hran nei thei turte chu anmahni ina an inkhung hran phalsak theih an ni a, dilna an siam erawh a tul dawn a ni.

Mizoram sorkar chuan Kohhran hall te pawh quarantine centre a hman a nih theih nan Kohhran hrang hrang a dawr a, Kohhran tam takin an remtih thu an sawi tawh a. Mimal enkawl Hotel room te pawh a tul anga hman turin sorkar chuan ruahmanna a siam bawk.

Quarantine Centre a awmte hi an ei leh in tur sorkarin a tumsak a, mi pakhat tan ni khatah Rs.300 hu zel sorkarin a tum a, ni 14 chhung-a mi pakhat ei leh in senso chu Rs. 4,200 a ni.

Tun dinhmuna lo haw tura inhriattir mi 10,496 te hi quarantine centre-a dah vek an nih chuan ni 14 chhungin an ei leh in ringawtah pawh Rs. 4,40,83,200 vel sen a tul dawn a ni.

Ram chhunga tangkhang mek, Mizorama lo haw duhte bakah hian India ram pawn lama awm mi 330 leh Cruise Line hrang hranga thawk mi 211 an awm bawk a, hetihrual hian Mizoram mi leh sa nilo, Mizoram chhunga tangkhang mek mi 547 an awm thung a ni.