Heng inthlan hmachhawn turah hian an Party-in hnehna an chan theih nan leh Mizoram hmun hrang hranga Congress Party mite rilru chawk tho turin zin chhuah Programme siam ni se an ti a. Nikuma Mizoram Assembly inthlanpui neih hmaa Congress Sorkar-in hna a lo pek fel tawh engemawzat, MNF Sorkar tharin dan tlawhchhan mumal awm lova a tih buai nia an sawite chu dan anga an hmuh let leh theih nan na taka beih zui ni se an ti bawk. MPCC puipate chuan, tun dinhmunah an Party chuan Sorkarna siam tawh rih lo mah se, ram leh mipuite thlavang hauh turin an party chuan theihtawp a chhuah zel dawn tih an sawi.
