Mizoram Truck Owners Association leh Mizoram Truck Driver Association-in Bairabi leh Aizawl inkar kawngpui chhe lutuk chu siam a nih loh avangin tun thla ni 11atanga ni 13 thleng, Mizoram pumah Truck tlantir loh ni se an ti. Heng pawl pahnih
hruaitute hi vawiin khan Chaltlanga Mizoram Truck Owners Association pisaah an thu khawm a, hemi hnua thuchhuah intawm an siamah MTOA leh MTDA chuan, Bairabi leh Aizawl inkar kawngpui siam tha tur hian tun thla ni 10 thleng hian sorkar an ngaichang niin an sawi a, an beisei anga hnathawh a awm tak loh avang leh, hnathawktuten tibuaitu awm lova kawng an siam theih nan tun thla ni 11 zing dar 5 atanga ni 13 tlai dar 5 thleng, Mizorma pumah Truck tlantir loh an tum ta niin an sawi a, hei hian state pawn lam Truck-te pawh a huam vek tur thu sawiin, a ruaka haw lamte erawh chu a huam loh tur thu an sawi. MTOA leh MTDA hian Bairabi leh Aizawl inkar kawngpui a chhiat avanga harsatna an tawh thu te, an nunna atan pawh hlauhthawnawm a nih thu leh kawngpui siam tha turin sorkar pawh an lo ngen tawh thu, August ni 29 khan thuchhuah intawm siamin an lo sawi tawh a ni.
